Policia e Shkodrës ka zbuluar një magazinë të përshtatur për kultivimin e kanabisit, gjatë fazës së nëntë të operacionit të koduar “Qarku”.
Në pranga ka rënë 35-vjeçari Altin Palushi, ndërsa gjatë kontrollit në banesën e tij, policia ka sekuestruar edhe dy armë me silenciator, një pistoletë dhe një kallashnikov si dhe sasi municionesh.
Një ditë më parë u finalizua faza e 8-të e këtij megaoperacioni, si rezultat i së cilës u sekestruan 2 armë zjarri, 2 radio policie, 3 mina me telekomandë, një bllokues valësh, 1.6 kg eksploziv C4, 2 armë gjahu, 1 armë sportive e munion luftarak. Dy shtetas u vunë në pranga, 1 u shpall në kërkim, ndërsa 2 të tjerë po procedohen penalisht.
Njoftimi i Policisë Shkodër:
Finalizohet faza e 9-të e këtij megaoperacioni.
Zbulohet një magazinë e përshtatur për kultivim të bimëve narkotike, me anë të llambave.
Policia gjen dhe sekuestron edhe 2 armë zjarri me silenciator (kallashnikov dhe pistoletë).
Gjenden dhe sekuestrohen edhe fara kanabisi që do të kultivoheshin në ambientin e përshtatur me llamba.
Arrestohet në flagrancë 35-vjeçari, poseduesi i sendeve të kundërligjshme.
Në vijim të megaoperacionit policor të koduar “Qarku”, strukturat e Komisariatit të Policisë Shkodër, në bashkëpunim me Forcën e Posaçme “Shqiponja”, bazuar dhe në inteligjencën informative, finalizuan me sukses fazën e 9-të të këtij megaoperacioni, në kuadër të së cilës u bë kapja dhe arrestimi në flagrancë i shtetasit:
Altin Palushi, 35 vjeç, banues në fshatin Beltojë, Shkodër.
Gjatë kontrollit të ushtruar nga Policia, në fshatin Beltojë, u zbulua një magazinë e përshtatur për kultivimin e bimëve narkotike, me anë të llambave. Në cilësinë e provës materiale u sekuestruan 35 llamba dhe pajisje të tjera elektrike që përdoren për këtë aktivitet kriminal.
Po në vijim të operacionit, në banesën e këtij shtetasi u gjetën dhe u sekuestruan në cilësinë e provës materiale 2 armë zjarri me silenciatorë (kallashnikov dhe pistoletë), municion luftarak, një sasi farash kanabisi dhe një sasi vlerash monetare.
