Abaz Mamo, i shpallur në kërkim ndërkombëtar dhe i dënuar nga autoritetet në Itali me 3.6 vite burg, është arrestuar sot nga Forca Operacionale në Vlorë. Ai është shpallur fajtor për veprën penale “Trafikim i narkotikëve”.
“Shërbimet e Forcës së Posaçme Operacionale dhe të Seksionit për Hetimin e Trafiqeve të Paligjshme dhe Narkotikëve, të DVP Vlorë, në bashkëpunim me Interpol Tirana, mbështetur dhe në inteligjencën informative, kanë organizuar dhe finalizuar operacionin policor të koduar “Brindisi”, si rezultat i të cilit u bë kapja dhe arrestimi provizor, me qëllim ekstradimin drejt Italisë, i shtetasit:
Abaz Mamo, 27 vjeç, banues në fshatin Çepeat, Vlorë.
Ky shtetas ishte shpallur në kërkim ndërkombëtar, pasi Gjykata e Brindisit, Itali, e ka dënuar me 3 vjet, 6 muaj e 3 ditë burgim, për veprën penale “Trafikimi i narkotikëve”, parashikuar nga Kodi Penal i Italisë. Interpol Tirana, në bashkëpunim me Interpol Roma, vijon procedurat për ekstradimin e këtij shtetasi drejt Italisë”, njofton Policia e Vlorës.
Marsin e vitit 2017, Karabinierët e Brindizit ushtruan kontroll blic në një shtëpi ku qëndronin dy shqiptarë. Aty ata gjetën 1.6 ton hashash që ruhej nga dy të rinjtë nga Shqipëria, një prej të cilëve ishte Abaz Mamo. Nga përllogaritjet e mediave në vendin fqinj, vlera e drogës ishte rreth 8 milionë euro.
