Më 10 gusht agjentët e krimeve në Komisariatin e Policisë Nr 4 në Tiranë kanë regjistruar një kallëzim të bërë nga biznesmeni Mikel Harizaj, se ka zbuluar një sasi prej 900gr lëndë shpërthyese në një godinë në pronësi të tij.
Ngjarja është regjistruar në rrugën ‘Ramazan Gaxherri’ në një dyqan në pronësi të të riut vlonjat, të cilit i janë bërë edhe 2 atentate të tjera më parë. Fatmirësisht lënda shpërthyese nuk është aktivizuar dhe hetuesit ende nuk e kanë përcaktuar nëse diçka nuk ka funksionuar apo ka patur vetëm qëllim kërcënimin e Harizajt.
Dyshimet kryesore të autoriteteve në lidhje me sagën e atentateve janë konfliktet e mëparshme të Harizajt, si dhe disa borxhe të pashlyera. Ai vijon aktivitetin si biznesmen në Tiranë, ndërsa armiqtë e tij atentatet e njëpasnjëshme, për autorësinë e të cilave policia nuk ka arritur të identifikojë dhe vërë para përgjegjësisë asnjë autor.
Nga ana tjetër, kur kanë kaluar 20 ditë nga atentati i 10 Gushtit, nuk ka patur ndonjë komunikatë zyrtare lidhur me ngjarjen.
