SHKODËR- Një 37-vjeçar ka humbur jetën në aksidentin e ndodhur pak më parë në aksin rrugor “Shkodër – Lezhë”. Gjithashtu bëhet me dije se nga aksidenti kanë mbetur të plagosur edhe gruaja dhe dy fëmijët e 37-vjeçarit. Sipas të dhënave paraprake, një kamion i drejtuar nga 42-vjeçari me iniciale T.K. dyshohet se ka humbur kontrollin dhe është përplasur fillimisht me një automjet tjetër dhe më pas është përplasur edhe me makinën që drejtohej nga 37-vjeçari Gjin Bzhangaj.
Gjin Bzhangaj ka ndërruar jetë në spital, ndërsa bashkëshortja e tij 32-vjeçare dhe dy fëmijët e mitur, ndodhen jashtë rrezikut për jetën. Policia dhe grupi hetimor po punojnë për zbardhjen e plotë të shkaqeve të aksidentit.
Njoftimi i policisë:
Shkodër / Informacion paraprak Rreth orës 14:50, në aksin rrugor “Shkodër – Lezhë”, ka ndodhur një aksident rrugor ku janë përfshirë tre automjete.
Shtetasi T. K., 42 vjeç, duke drejtuar kamionin e tij, dyshohet se ka humbur kontrollin mbi drejtimin e automjetit dhe si pasojë automjeti është përplasur fillimisht me automjetin me drejtues A. S., 63 vjeç, dhe më pas është përfshirë në aksident edhe automjeti me drejtues shtetasin Gj. B., 37 vjeç.
Si pasojë e përplasjes, ka ndërruar jetë në Spitalin Rajonal Shkodër shtetasi Gj. B., ndërsa janë dëmtuar bashkëshortja e tij, shtetasja J. B., 32 vjeçe, dhe dy fëmijët e mitur, pasagjerë në të njëjtin automjet. Të dëmtuarit ndodhen jashtë rrezikut për jetën.
Grupi hetimor vijon punën për zbardhjen e plotë të rrethanave dhe përcaktimin e shkakut të aksidentit
