Elsa Lila u shpall fituese e Festivalit të RTSH, pasi mori votat e jurisë profesioniste. Por ndryshe nga herët e tjera, fituesi nuk do të shkojë automatikisht në Eurovision. Këtë të drejtë e mori Albina dhe familja Kelmendi, të cilët fituan votat e publikut.
Lila fitoi për herë tretë çmimin e parë, në po kaq pjesëmarrje, me këngën “Evita”, kushtuar vajzës së saj. Ndërsa Albina Kelmendi mori votat e publikut për performancën e saj me këngën “Duje”, që e këndoi me familjen e saj. Kelmendi fitoi edhe vendin e dytë nga votat e jurisë, ndërsa vendin e tretë e mori grupi “2 Farm” me këngën “Atomike”.
Festivali Europian i këngës do të zhvillohet në maj 2023, në Liverpul të Anglisë, pasi vendi që i takoi e drejta, Ukraina, u tërhoq për arsye sigurie si pasojë e pushtimit të vendit nga Rusia.
