Arrestohet pas dy vitesh në arrati, Daniel Pepaj, i cili akuzohet si autor i vrasjes së dy kushërinjve Klement Pepaj dhe Vilson Çutaj në Malësinë e Madhe në vitin 2020.
27 vjeçari ishte shpallur në kërkim, pasi Gjykata e Shkodrës i ka caktuar masën e sigurisë “Arrest në burg”, për veprat penale: “Vrasja me paramendim”, e kryer në bashkëpunim”, “Mbajtja pa leje e armëve, armëve shpërthyese dhe municionit luftarak” dhe “Kultivimi i bimëve narkotike”.
Pas vrasjes së dyfishtë, Pepaj u arratis drejt Malit të Zi dhe vetëm sot është vetëdorëzuar në Polici, duke pranuar kryerjen e krimit të rëndë.
Në 8 tetor 2020 në medie u raportua se lajmi për zbulimin e dy trupave të pajetë, të cilët u gjetën në zonën malore të Rrencit, afër fshatit Vrith 250 metra larg parcelës me kanabis. Autor i dyshuar i vrasjes së tyre u shpall pikërisht Daniel Pepaj. Konflikti mes kushurinjve kishte ndodhur për shkak të parcelave të mbjella me kanabis.
Njoftimi i Policisë:
Malësi e Madhe/Shkodër
Finalizohet operacioni policor i koduar “Vrith”, për kapjen e një personi në kërkim, me rrezikshmëri të lartë shoqërore.
Vihet në pranga 27-vjeçari, për vrasje të dyfishtë me armë zjarri. Shërbimet e Komsiariatit të Policisë Malësi e Madhe, në bashkëpunim me Forcën Operacionale të DVP Shkodër, ndaluan shtetasin: -D. P, 27 vjeç, banues në fshatin Vrith, Malësi e Madhe. Ky shtetas ishte shpallur në kërkim, pasi Gjykata e Shkodrës i ka caktuar masën e sigurisë “Arrest në burg”, për veprat penale “Vrasja me paramendim”, e kryer në bashkëpunim”, “Mbajtja pa leje e armëve, armëve shpërthyese dhe municionit luftarak” dhe “Kultivimi i bimëve narkotike”.
27-vjeçari dyshohet se në fshatin Vrith, më datë 03.10.2020, ka vrarë me armë zjarri, shtetasit V. Ç. dhe K. P. Materialet i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme.
