Biblioteka “Apostol Meksi” ka hapur në ambientet e Muzeut të Luftës së Ftohtë në Gjirokastër një ekspozitë të veçantë me gazeta dhe botime nga periudha 1950–1990. Materialet janë vendosur përgjatë mureve të tunelit, duke u ofruar vizitorëve një mënyrë të drejtpërdrejtë për të parë se si pasqyroheshin ngjarjet, propaganda dhe jeta e përditshme gjatë regjimit komunist, çka e bën vizitën një përjetim më të plotë historik.
Ekspozita ka tërhequr interes të veçantë nga turistët vendas dhe të huaj, të cilët, përveç eksplorimit të hapësirave të tunelit, ndalen për të lexuar artikujt dhe titujt e gazetave të ruajtura ndër vite. Vizitorët kanë vlerësuar madhësinë e tunelit dhe pasurinë historike të ekspozimit; një turistesh thotë: “Tuneli ishte shumë më i madh nga sa e kisha imagjinuar. Qyteti është i qetë, shumë i bukur dhe pamja është fantastike. Ekspozita me gazetat e bën vizitën tonë edhe më interesante dhe na ndihmon të kuptojmë më mirë historinë e këtij vendi.” Një turist nga Italia shtoi: “Tuneli është shumë interesant dhe me një histori të veçantë. Vizitova të gjitha hapësirat, përfshirë mensën, ndërsa gazetat e ekspozuara nga periudha e diktaturës e bëjnë këtë vend edhe më domethënës. Do t’ua rekomandoja të gjithëve të vizitonin Gjirokastrën dhe Shqipërinë, sepse është vërtet një përvojë e mrekullueshme.”
Organizatorët bëjnë me dije se ekspozita do të qëndrojë e hapur për 10 ditë dhe se kjo është vetëm nisma e parë. Në vijim, hapësirat e Muzeut të Luftës së Ftohtë do të pasurohen me ekspozita të tjera tematike, me synimin për të rritur vizitueshmërinë dhe për ta kthyer këtë objekt historik në një destinacion kulturor më tërheqës gjatë gjithë vitit.
