Bashkim Gashi nga Kosova u arrestua nën dyshimin se gjatë natës mes të martës dhe të mërkurës vrau gruan me të cilën bashkëjetonte në Ulqin dhe më pas i vuri zjarrin shtëpisë ku jetonin, njoftoi policia. Ngjarja ndodhi në lagjen Kodre të Ulqinit; policia u njoftua rreth orës 00:30 për një zjarr në një objekt banimi. Zyrtarët dolën menjëherë në vendngjarje dhe gjetën trupin e pa jetë të një personi, i identifikuar më vonë si D.N., 36 vjeçe, shtetase e Shqipërisë.
Policia tha se në një kohë shumë të shkurtër identifikoi dhe vuri nën kontroll personin që dyshohet se kreu veprën penale. Në vendngjarje gjetën një person me lëndime nga zjarri, i cili më vonë u konstatua se ishte Gashi, 46 vjeç. Ai është lënduar nga flakët dhe është dërguar për trajtim mjekësor së pari në Spitalin e Përgjithshëm në Tivar, e më pas në Qendrën Klinike të Malit të Zi në Podgoricë, ku po trajtohet për djegiet dhe po ruhet nga policia.
Rasti i është njoftuar prokurorit të shtetit në Prokurorinë e Lartë Shtetërore në Podgoricë. Sipas njoftimit, zyrtarët policorë, në koordinim dhe me urdhër të prokurorit kompetent, kanë ndërmarrë të gjitha masat për zbardhjen e ngjarjes: kanë marrë deklarata nga disa persona, kanë sekuestruar pamje nga kamerat e sigurisë dhe prova materiale nga vendi i ngjarjes, të cilat do t’i nënshtrohen ekspertizës.
Hetimet në vendin e ngjarjes janë kryer nga prokurorja kompetente e Prokurorisë së Lartë Shtetërore në Podgoricë me pjesëmarrjen e zyrtarëve policorë dhe në prani të një eksperti për zjarre, shpërthime dhe aksidente teknike. Prokurorja e ka cilësuar rastin si vepër penale të vrasjes së rëndë. Veprimet e deritanishme policore dhe prokuroriale tregojnë dyshime se B.G. ka kryer vrasjen, ka shkaktuar zjarrin dhe më pas është larguar nga vendi i ngjarjes.
Trupi i viktimës është dërguar për obduksion mjeko-ligjor në Qendrën Klinike në Podgoricë për të përcaktuar shkakun e vdekjes dhe rrethanat e sakta. Publiku do të njoftohet më vonë nga organet kompetente që po merren me hetimin.
