Xhemal Halili është 76 vjecari nga fshati i Rrajcës i cili jeton në kushte të mjerueshme. Pa shtëpi e familje, pasi bashkëshortja dhe fëmijët e kanë braktisur. Xhemali jeton i vetëm në mes të pyllit teksa fle mbi trungun e një peme, në një krevat me tri dërrasa.
Në Rrajcë banorët e quajnë tarzani i fshatit, për mënyrën si jeton. Shumë pranë natyrës dhe në kushte ekstreme të mbijetesës.
Krejtësisht i braktisur, pa familje dhe pa mudësi për të punuar ia del të mbijetojë duke rritur bagëtitë e tij me shpresën se do t’i shesë.
“Këtu fle me bagëtinë, herë mbi pemë e herë në tokë. Shum vështirë, them ishalla i shes se s’kam zgjidhje tjetër”- shprehet ai.
Dikur Xhemali ka punuar si saldator, ndërsa me paratë e marra nga emigracioni bleu bagëtitë që ka edhe sot. Ai thotë se ka trokitur shpesh në dyert e Bashkisë Prrenjas, por kurrë nuk ka marë zgjidhje. Në kushte tejet të vështira, Xhemal Halili apelon për ndihmë, me shpresën se dikush do mundet t’i ofrojë zgjidhje e t’i lehtësojë sado pak jetën.
