Atmosfera para finales së Kupës së Botës u ndez jashtë konferencave zyrtare kur FIFA organizoi një aktivitet në “Fan Fest”, ku morën pjesë trajnerët Luis de la Fuente dhe Lionel Scaloni, si dhe Rodrigo Hernández (Rodri) dhe portieri Emiliano “Dibu” Martínez. Vëmendja u përqendrua te Lionel Messi, i cili u shfaq si surprizë në aktivitetin e moderuar nga Novak Djokovic, Kevin Durant dhe Tom Brady.
Gjatë bisedës, përveç analizës së finales së së dielës, Messi foli lart për talentin e Spanjës, Lamine Yamal. Ai e përshkroi lojtarin si “një futbollist i jashtëzakonshëm” dhe vuri në dukje se e ka ndjekur nga afër, pasi Yamal luan te një klub që Messi e do dhe për të cilin i uron sukses. “Edhe pse është vetëm 19 vjeç, ai tashmë është një nga lojtarët më të rëndësishëm në futbollin botëror. Ka gjithë karrierën përpara dhe mundësinë për të shkruar histori. Ne do të përpiqemi që kjo të mos ndodhë këtë herë”, deklaroi Messi me buzëqeshje.
Në aktivitet u rikujtua edhe fotografia ikonike të realizuar 19 vjet më parë për një kalendar bamirësie, ku Messi mban në krahë një foshnjë që sot njihet si Lamine Yamal. Messi e cilësoi përjetimin si “diçka e pabesueshme”, duke shtuar se jeta të surprizon kur nga një foto me një foshnjë të luash tani kundër njëri-tjetrit në finalen e Botërorit. “Ai është një nga më të mirët në botë në këtë moment. I uroj shumë suksese, sepse suksesi i tij është edhe suksesi i Barcelonës. Megjithatë, ne do të bëjmë maksimumin që të mos jetë në ditën e tij më të mirë, edhe pse është shumë e vështirë”, u shpreh Messi.
Megjithë vlerësimet për Yamalin, kapiteni argjentinas theksoi se fuqia e Spanjës nuk varet vetëm nga talenti i ri i Barcelonës: “Nuk është vetëm Lamine. Spanja ka shumë futbollistë cilësorë dhe luan një futboll të shkëlqyer. Edhe ne kemi armët tona”, përfundoi Messi, i cili synon të fitojë Kupën e dytë të Botës në karrierë përballë Spanjës.
