Në pamje të parë ngjan si një pajisje e teknologjisë së viteve 90’, por kjo që shikoni në foto, jo më kot është quajtur si ëndrra e çdo hakeri.
Bëhet fjalë për pajisjen e quajtur Zero Flipper, dhe që shitet lehtësisht në internet për rreth 200 mijë lekë të vjetra, ndonëse kërkesa e lartë ka bërë që të blihen thuajse menjëherë.
Ajo që është më e frkishme ka të bëjë me faktin se pajisja e vogël është në gjendje të lexojë, kopjojë dhe emulojë tag-et e radiofrekuencës (RFID), NFC, telekomandat e radios dhe çelësat digjitalë e të tjera.
E thënë me fjalë të thjeshta, brenda ekranit të vogël të kësaj pajisjeje, përdoruesi mund ta programojë lehtësisht të lexojë dhe kopjojë çipin që ndodhet në një kartë krediti, më pas mund ta emulojë atë, duke e përdorur vetë pajisjen në vend të kartës.
Zero Flipper gjithashtu mund të kopjojë dhe dekriptojë sinjalin infrared, që do të thotë se mund të shërbejë si telekomandë për thuajse çdo lloj pajisje. Në rrjetet sociale janë bërë virale videot ku njerëz të ndryshëm e përdorin Zero Flipper për të hapur dyert e makinave Tesla, për t’i hapur e mbyllur pasqyrat, bagazhin dhe shumë veprimtari të tjera.
Për përdorim më të avancuar, pajisja është e aftë që të funksionojë si BadUSB, një metodë ku USB-ja përdoret për të kryer sulme kompjuterike.
Një mënyrë e mirë për të ndaluar kopjimin e kartave të kreditit përmes leximit të çipit RFID, është të përdorni një prej atyre kartave që quhen bllokues RFID. Këto karta shërbejnë si bllokues dhe mbahen në portofol së bashku me kartat e tjera bankare, duke arritur të bllokojnë leximin nga ndonjë pajisje apo person i tretë pa autorizimin tuaj.
