Gjatë një interviste në emisionin “Canal Football Club”, Michel Platini sulmoi ashpër Gianni Infantinon, duke e cilësuar atë dhe drejtuesit e tjerë të futbollit botëror si “burokratë të çmendur”. Legjenda franceze ritheksoi armiqësinë me presidentin e FIFA-s, që prej kur konflikti i tyre u zhvendos në gjykatat franceze në fillim të verës. Platini ka depozituar një padi kundër Infantinos për “ushtrim të ndikimit të paligjshëm”, “komplot kriminal për shpifje” dhe “kallëzim të rremë”.
Përpara përplasjeve ligjore, të dy kishin bashkëpunuar gjatë kohës kur Platini ishte president i UEFA-s dhe Infantino sekretar i përgjithshëm (2007–2015). Platini tha se që atëherë kishte vënë re etjen e Infantinos për pushtet: “Ai kishte pak nga kjo natyrë, por asokohe kishte një shef mbi kokë. Gjithmonë e kam ditur që i pëlqenin shumë paratë dhe pushteti,” u shpreh ai.
Platini theksoi se drejtuesit e sotëm janë më shumë përfitues të sportit sesa njerëz që kuptojnë thelbin e tij, duke bërë dallimin me lojtarët si “shefat e vërtetë”. Në fjalinë e tij: “Futbolli është një festë e mrekullueshme, ndeshjet janë ato që kanë rëndësi. Pjesa tjetër është thjesht politikë, një mikrokozmos njerëzish që mendojnë se janë bosët e futbollit. Por shefat e vërtetë janë Mbappé, Zidane, Maradona… Këta të tjerët janë thjesht burokratë që arrijnë në një pozicion, shijojnë lavdinë e paratë dhe më pas i humbasin ato. Ne kemi nevojë për lojtarë,” tha Platini.
Ndërkohë, UEFA po shqyrton mundësinë e ndjekjes penale të Infantinos në gjykatat zvicerane për “menaxhim të pandershëm”. Platini beson se nëse UEFA synon rrëzimin e presidentit të FIFA-s, kjo do të bëhet përmes rrugës gjyqësore: “Ai ka dështuar sepse duhej të ishte garantuesi i rregullave të lojës, por nuk i respektoi ato. Ai duhet të largohet!”
Në përfundim, Platini rrëzoi çdo mundësi për rikthim në poste drejtuese, duke deklaruar: “Klubet apo organet drejtuese? Për mua kapitulli është i mbyllur.”
