Një ngjarje e çuditshme dhe e pazakontë është regjistruar në Scottsbluff, Nebraska, ku një grua u plagos në krah pas një të shtëne me armë zjarri që, sipas policisë, dyshohet të ketë ardhur nga një qen brenda një furgoni. Ngjarja ndodhi teksa gruaja po priste që semafori të bëhej jeshil, me krahun e djathtë jashtë dritares së automjetit. Papritmas u dëgjua një krismë e fortë; menjëherë pas saj ajo ndjeu dhimbje në krah dhe konstatoi se ishte plagosur.
Hetimet paraprake të policisë tregojnë se në një furgon të parkuar pranë një pike karburanti ndodhej një pushkë gjuetie e lënë në sediljen e pasme, e mbushur dhe me një fishek në dhomën e fishekut, sipas raportimeve të mediave. Pronari i automjetit kishte hyrë në një dyqan pranë stacionit të karburantit, duke e lënë armën brenda mjetit. Autoritetet dyshojnë se qeni që ndodhej brenda furgonit u lëviz mbi armë, dhe kjo lëvizje ka shkaktuar në mënyrë të paqëllimshme shkrepjen që përshkoi derën e mjetit dhe plagosi gruan që ndodhej aty pranë.
Viktima u dërgua menjëherë në spital nga një familjar; sipas mjekëve, plagët e saj nuk konsiderohen kërcënuese për jetën. Policia mbërriti shpejt në vendngjarje dhe fillimisht dyshoi për një incident të mundshëm me armë zjarri, si shumë raste të tjera në SHBA. Pas kontrollit të automjetit, hetuesit konstatuan se brenda ndodhej vetëm qeni i pronarit dhe arma e lënë pa siguri.
Autoritetet po vijojnë hetimet për të sqaruar plotësisht rrethanat e ngjarjes dhe për të verifikuar detajet e raportuara. Rasti ka tërhequr vëmendje për shkak të natyrës së tij të pazakontë dhe absurdit, duke u raportuar gjithashtu nga mediat që ndoqën zhvillimet e incidentit.
