Fenerbahçe po punon për të afruar legjendën e Milanit, Paolo Maldinin, në strukturat drejtuese të klubit turk. Sipas mediave turke dhe gazetarit Yagiz Sabuncuoglu, është zhvilluar një takim i dytë në Stamboll mes Maldinit dhe kandidatit për president të Fenerbahçes, Hakan Safi. Pas një takimi fillestar në Milano, Safi synon ta emërojë ish-drejtorin teknik të Milanit si përgjegjës për projektin sportiv të klubit, me fokus te merkatoja dhe ndërtimi i skuadrës për sezonin e ardhshëm.
Një nga emrat që lidhet me ardhjen e mundshme të Maldinit është ai i Rafael Leao. Sulmuesi portugez i Milanit është një nga objektivat që Fenerbahçe po monitoron nga afër, ndërsa e ardhmja e tij në “San Siro” mbetet e pasigurt. Leao u transferua nga Lille te Milan në vitin 2019 për 49.5 milionë euro dhe ka zhvilluar 290 ndeshje me kuqezinjtë, duke realizuar 80 gola dhe 65 asistime. Raportet me tifozët janë ftohur javët e fundit, ndërsa një postim i fundit në rrjetet sociale është interpretuar si një mesazh lamtumire.
Kontrata e Leao-s përfshin një klauzolë largimi prej 175 milionë eurosh, e vlefshme nga 1 deri më 15 korrik, por Milani raportohet se do të ishte i gatshëm ta shiste për një shumë mes 40 dhe 60 milionë eurove. Megjithatë, transferimi te Fenerbahçe mbetet i komplikuar për dy arsye kryesore: zgjedhjet presidenciale të klubit që do të mbahen më 6 dhe 7 qershor, ku sipas raporteve Aziz Yildirim konsiderohet favorit; dhe paga e lartë e portugezit, që përfiton rreth 5 milionë euro neto në sezon te Milani.
Përveç interesit të Fenerbahçes, klube të tjera monitorojnë situatën e Leao-s. Manchester United vazhdon ta ndjekë, ndërsa emri i Joshua Zirkzee përmendet si alternativë në rast largimi. Po ashtu, nga Arabia Saudite, Al Nassr po ndjek me vëmendje zhvillimet rreth sulmuesit portugez. Raportimi mbi këto zhvillime është bërë nga burime mediatike dhe Top Channel.
