Një azilkërkues jordanez, i identifikuar në raportime si 28-vjeçari Ahmad Al-Saqar, dyshohet se u largua nga Irlanda pasi e dashura e tij u gjet e vrarë në banesën e saj. Sipas mediave britanike, Al-Saqar kishte hyrë fillimisht në Mbretërinë e Bashkuar si turist duke përdorur një autorizim elektronik udhëtimi me vlerë 10 paundësh, më pas kaloi në Irlandën e Veriut dhe hyri në Republikën e Irlandës, ku kërkoi azil.
Rasti lidhet me vdekjen e 43-vjeçares amerikane Jamey Carney, e cila u gjet pa shenja jete në shtëpinë e saj në Killarney, qarku Kerry, më 7 korrik. Trupin e saj e zbuloi vajza 13-vjeçare, e cila ishte kthyer në shtëpi pas një nate jashtë. Sipas autopsisë, Carney humbi jetën nga mbytja, ndërsa mediat raportojnë se ajo ishte goditur edhe me kapakun e rezervuarit të tualetit.
Hetuesit irlandezë dyshojnë se Al-Saqar u largua nga banesa në orët e para të mëngjesit të 7 korrikut dhe fluturoi drejt Stambollit, përpara se të vazhdonte për në Jordan. Ai është lokalizuar dhe arrestuar nga autoritetet jordaneze, por procedurat për kthimin e tij në Irlandë mbeten të paqarta, pasi mes dy vendeve nuk ekziston marrëveshje ekstradimi, raporton The Sun. Dy oficerë të policisë irlandeze kanë udhëtuar në Jordan për të diskutuar mundësinë e rikthimit të tij, me qëllim që ai të përballet me një akuzë të mundshme për vrasje.
Autoritetet thonë se Al-Saqar kishte përfituar status mbrojtjeje plotësuese në Irlandë, një formë mbrojtjeje humanitare për ata që nuk kualifikohen si refugjatë, por që rrezikojnë dëmtime serioze nëse kthehen në vendin e origjinës. Ky status i kishte lejuar edhe rikthimin e pasaportës, gjë që sipas raportimeve i mundësoi të largohej nga vendi para se të lëshohej një urdhër-arrest ndërkombëtar. Megjithëse nuk është shpallur zyrtarisht i dyshuar nga policia irlandeze, ai konsiderohet person kyç për hetimin.
Carney ishte zhvendosur në Irlandë në 2021 dhe kishte nisur një lidhje me Al-Saqar pasi u njohën në një protestë pro-palestineze. Familjarët e saj e përshkruajnë si të përkushtuar ndaj të tjerëve dhe të angazhuar për mbrojtjen e të drejtave të njeriut. Policia irlandeze vijon hetimet dhe ka bërë thirrje që kush ka informacion mbi rastin të kontaktojë autoritetet.
