Vijojnë kërkimet për gjetjen e minatorit Ilir Koloveri, 40 vjeç, i cili dyshohet se ka humbur jetën pasi mbeti i bllokuar në një nga galeritë e minierës në zonën e Tërnovës së Madhe, Njësia Administrative Zerqan, Bashkia Bulqizë. Ekipet e shpëtimit, së bashku me specialistët e minierës dhe strukturat përgjegjëse, kanë punuar pa ndërprerje gjatë gjithë natës dhe vazhdojnë operacionin edhe në mëngjesin e sotëm për të lokalizuar dhe nxjerrë trupin e minatorit. Sipas të dhënave paraprake, Koloveri u kap pas një shembjeje masive të materialit minerar brenda galerisë.
Kushtet e vështira nëntokësore, rreziku i shembjeve të tjera dhe sasia e madhe e materialit të rrëzuar kanë vështirësuar ndërhyrjen, ndaj ekipet po avancojnë me kujdes për të garantuar sigurinë e tyre gjatë operacionit. Autoritetet bëjnë me dije se operacioni do të vazhdojë pa ndërprerje deri në përfundimin e kërkimeve dhe se çdo informacion zyrtar do të bëhet publik sapo të ketë zhvillime të reja.
Ngjarja rikthen në kujtesë një aksident të ngjashëm të vitit 2021, kur minatori Muhartem Plaku mbeti i bllokuar për pesë ditë në një nga galeritë e Zonës së Parë pas shembjes së një sasie të madhe materialit. Pas një operacioni të gjatë dhe të vështirë kërkim-shpëtimi, ekipet arritën të nxirrnin trupin e pajetë vetëm pas pesë ditësh, për shkak të vështirësive të krijuara nga shembja dhe bllokimi i galerisë.
Aksidentet në minierat e Bulqizës vijojnë të ngjallin shqetësim për kushtet e punës dhe sigurinë e minatorëve. Ngjarje të tilla tragjike rikthejnë në vëmendje nevojën për masa më të forta parandaluese dhe kontrolle të vazhdueshme në galeritë e shfrytëzimit minerar.
