Dy persona mbeten të zhdukur pas fundosjes së një anijeje peshkimi me regjistrim francez në Kanalin Anglez, ndërsa tre të tjerë u shpëtuan dhe u dërguan në spital për trajtim të mëtejshëm. Ngjarja u raportua pak pas orës 18:00 të së shtunës, kur Agjencia Detare dhe e Rojës Bregdetare të Mbretërisë së Bashkuar mori njoftim se anija, me pesë persona në bord, ishte “në rrezik” pranë brigjeve të Plymouth, në Devon.
Menjëherë pas alarmit, në zonë u dërguan një helikopter i rojës bregdetare, një avion dhe varka shpëtimi të RNLI-së nga Falmouth dhe Plymouth. Autoritetet thonë se anija besohet të ketë pasur vështirësi në jugperëndim të farit Eddystone, rreth 15 milje në jug të Plymouth. Më vonë gjatë mbrëmjes tre persona u nxorrën nga deti dhe iu dhënë ndihma mjekësore, për t’u dërguar më pas në spital për trajtim të mëtejshëm.
Operacioni i kërkim-shpëtimit vazhdoi gjatë gjithë natës dhe u rikthye edhe gjatë së dielës me disa mjete të angazhuara në kërkim. Autoritetet njoftuan se anija është fundosur dhe se kërkimi po vazhdon për dy persona që ende rezultojnë të zhdukur. Sipas raportimit zyrtar, tre personat u shpëtuan mbrëmjen e së shtunës nga anija e peshkimit me regjistrim francez, e cila kishte bërë thirrje për ndihmë, ndërsa për dy të tjerët po vijon puna për t’i gjetur.
Deri tani nuk janë bërë të ditura rrethanat e sakta që çuan në fundosjen e anijes, dhe autoritetet e përfshira po vazhdojnë operacionin kërkimor në përpjekje për të lokalizuar personat e zhdukur. Në angazhim marrin pjesë forcat e rojës bregdetare, aeroplanë dhe varka shpëtimi të RNLI-së, të cilat vepruan menjëherë pas sinjalizimit për emergjencë pranë bregdetit të Plymouth. Ende nuk ka informacione shtesë mbi identitetin e personave të përfshirë, gjendjen e tyre shëndetësore jashtë tre të shpëtuarve, ose shqyrtime të mëtejshme për shkaqet e incidentit.
