Një ngjarje e rëndë kriminale tronditi Girónin në veri të Kolumbisë, kur dy gra 20-vjeçare u ekzekutuan nga persona të armatosur dhe të maskuar në orët e para të mëngjesit të së dielës. Viktimat, identifikuar si Karen Valentina Vega Peralta dhe Cristina Amaya Diaz, po ktheheshin nga një dalje nate kur, sipas policisë, u ndoqën nga persona që lëviznin me motoçikletë. Pak minuta më vonë autorët e maskuar u zunë pritë dhe hapën zjarr ndaj tyre në rrugë.
Sipas mediave lokale dhe burimeve policore, Peralta punonte si modele në kamera online dhe njëkohësisht ushtronte profesionin e infermieres. Hetimet paraprake tregojnë se ajo dyshohet se ishte në një lidhje me një anëtar të bandës së trafikut të drogës “Los del Sur”, një marrëdhënie që autoritetet mendojnë se mund të ketë qenë arsyeja kryesore e atentatit mafioz. Autoritetet besojnë se objektivi kryesor i sulmit ishte Peralta, ndërsa Diaz dyshohet se u vra aksidentalisht pasi ndodhej me të në momentin e sulmit.
Peralta u godit me plumba në shpatull dhe në gjoks dhe humbi jetën në vendngjarje; trupi i saj mbeti i shtrirë në rrugë deri në mbërritjen e forcave të policisë dhe ekipeve mjekësore. Shoqja e saj, Diaz, u plagos rëndë dhe u transportua me urgjencë në një spital lokal, ku nuk arriti t’i mbijetojë plagëve dhe ndërroi jetë pak kohë më vonë.
Pas ngjarjes policia nisi një operacion të gjerë për identifikimin dhe arrestimin e autorëve. Autoritetet kanë ngritur një “ekip special hetimor” që po analizon kamerat e sigurisë dhe dëshmitë e mbledhura në zonë për të zbardhur plotësisht krimin. Hetimet vazhdojnë për të përcaktuar lidhjet dhe motivet pas atentatit.
Vrasja e dy të rejave ka rikthyer shqetësimin për nivelin e lartë të dhunës dhe aktivitetit të bandave kriminale në disa rajone të Kolumbisë, ku atentatet me armë zjarri dhe larjet e hesapeve mes grupeve rivale mbeten të shpeshta.
