Rodrigo Hernández Cascante, i njohur si Rodri, ka mbërritur në Barcelonë për të finalizuar transferimin te klubi katalanas dhe për t’u bërë afrimi kryesor i Barcelonës në merkato këtë verë. Pas afrimeve të Gordon, Adeyemi, Bisiëu dhe Cancelo, mesfushori madrilen konsiderohet goditja kryesore te blaugrana, ndërsa klubi vijon të punojë edhe për sjelljen e një sulmuesi të ri.
Barcelona dhe Manchester City kanë arritur një marrëveshje paraprake për transferimin e Rodrit. Sipas marrëveshjes, Barça do të paguajë 60 milionë euro fikse, ndërsa 11 milionë euro të tjera do të jenë në formën e bonuseve, në varësi të titujve të fituar. Mesfushori mbërriti në terminalin e fluturimeve private të El Pratit, ku u prit nga një numër i madh gazetarësh. Në fjalët e para pas mbërritjes, Rodri shprehu kënaqësinë për transferimin: “Jam i lumtur që mbërrita. Kanë qenë disa ditë intensive, por jam shumë i lumtur që jam këtu. Të luash për Barcelonën është një ëndërr. Të shkojmë për Championsin dhe për gjithçka që na del përpara”, tha ai.
Pas mbërritjes, mesfushori u nis drejt hotelit ku do të qëndrojë përkohësisht deri në vendosjen në banesën e re. Të martën në mëngjes ai do t’u nënshtrohet testeve mjekësore dhe fizike, para firmosjes së kontratës me Barcelonën. Klubi katalanas planifikon të prezantojë zyrtarisht Rodrin të martën rreth orës 13:00, nëse procedurat burokratike dhe shkëmbimi i dokumenteve mes Barcelonës dhe Manchester Cityt përfundojnë në kohë.
Lëvizja përforcon repartin mesfushor të Barcelonës dhe përbën një nga investimet kryesore të merkatos së verës për klubin, i cili synon të forcohet edhe në fazën sulmuese. Në përfundim të procedurave dhe pas formaliteteve, pritet që Rodri të integrohet në skuadër dhe të nisë përgatitjet me klubin katalanas.
