Presidenti ukrainas Volodymyr Zelensky deklaroi në një intervistë për CBS News se Rusia dërgoi qëllimisht dronë në hapësirën ajrore të Moldavisë ndërsa avioni i tij presidencial ndodhej atje. Ai tha se incidenti ndodhi më 8 shtator, kur po largohej nga Moldavia drejt Norvegjisë, dhe se droni kaloi pranë avionit të tij. Kryeministri norvegjez Jonas Gahr Støre pati thënë më parë se avioni i Zelenskyt “pothuajse u godit” nga një dron. Sipas presidentit, një incident i ngjashëm ndodhi edhe gjatë kthimit të tij në Ukrainë përmes Kishinauit, kur një ose dy dronë hynë sërish në hapësirën ajrore moldave. Zelensky tha: “Mendoj se e dinin”, duke lënë të hapur mundësinë që aktiviteti rus të kishte lidhje me praninë e tij në Moldavi.
Ministria e Mbrojtjes e Moldavisë kishte konfirmuar më herët shkeljen e hapësirës ajrore nga një dron, por nuk e kishte lidhur zyrtarisht incidentin me fluturimin e presidentit ukrainas. Në intervistën me CBS News, Zelensky foli edhe për mundësinë e një armëpushimi dhe për negociata të mëtejshme. Ai deklaroi se Ukraina është e gatshme për një armëpushim pa kushte përgjatë vijës aktuale të frontit, nëse Rusia ndërmerr veprimin e njëjtë. Sipas tij, një armëpushim i tillë mund të shërbejë si pikënisje për negociata diplomatike me ndërmjetësimin e partnerëve ndërkombëtarë.
Presidenti tha gjithashtu se është i gatshëm të takohet personalisht me Vladimir Putin, nëse një takim i tillë do të ndihmonte në përfundimin e luftës. Ai kundërshtoi idenë se konflikti mund të zgjidhet vetëm përmes lëshimeve territoriale, duke argumentuar se Ukraina ka nevojë për garanci sigurie për të parandaluar një konflikt të ri. Përsa i përket propozimit për ndalimin e sulmeve ndaj infrastrukturës energjetike, Zelensky tha se ende nuk është e qartë nëse një armëpushim i tillë është në fuqi dhe shtoi se Ukraina kërkon garanci se Rusia është e gatshme ta respektojë atë.
