Një dron rus, i përdorur në sulmet ajrore gjatë natës ndaj Ukrainës, u rrëzua mbi një ndërtesë banimi në qytetin rumun të Galațit, duke shkaktuar dy të plagosur lehtë, evakuimin e disa banorëve dhe frikë lidhur me një goditje ndaj një vendi anëtar të NATO-s. Ndërtesa mori flakë, ndërsa policia dhe ekipet e ndihmës mbërritën me urgjencë në vendngjarje.
Ministria rumune e Mbrojtjes njoftoi se droni ishte monitoruar nga radarët teksa lëvizte në hapësirën ajrore të Rumanisë para se të përplasej në çatinë e ndërtesës. Si reagim, ushtria rumune ngriti në ajër dy avionë luftarakë F-16 dhe një helikopter, të autorizuar për të ndërhyrë ndaj objektivave të dyshimta. Banorët në zonat e rrezikuara morën mesazhe paralajmëruese. Autoritetet vendase pohojnë se situata aktualisht është nën kontroll.
Galați ndodhet pranë lumit Danub, afër kufirit lindor me Moldavinë dhe Ukrainën; incidenti vjen në një moment kur Rusia ka intensifikuar përdorimin e raketave balistike me rreze të gjatë dhe dronëve për sulme ndaj infrastrukturës energjetike dhe qyteteve ukrainase.
Ngjarja nxiti reagime ndërkombëtare: Sekretari i Përgjithshëm i OKB-së, Antonio Guterres, paralajmëroi në Këshillin e Sigurimit se intensifikimi i sulmeve mund të sjellë pasoja të paparashikueshme dhe të rrezikshme, duke kërkuar më shumë diplomaci, ulje të menjëhershme të tensioneve dhe një armëpushim të plotë e pa kushte. Shefja e diplomacisë europiane, Kaja Kallas, e përshkroi incidentin si “shkelje të qartë dhe serioze” të sovranitetit të Rumanisë dhe të hapësirës ajrore europiane, duke shprehur solidaritetin e Bashkimit Europian me Rumaninë në bisedën me ministren e Jashtme rumune, Oana Toiu.
Presidentja e Komisionit Evropian, Ursula von der Leyen, vuri në dukje se Rusia kishte kaluar një tjetër vijë të kuqe dhe njoftoi se po përgatitet paketa e 21-të e sanksioneve, si dhe forcuar masat parandaluese të sigurisë në kufirin lindor. NATO e dënoi incidentin si “papërgjegjshmëri të Moskës”; zëdhënësja Allison Hart njoftoi se aleanca do të vazhdojë të forcojë mbrojtjen, përfshirë kundër dronëve, dhe se sekretari i përgjithshëm Mark Rutte është në kontakt me autoritetet rumune. Rumania ka thirrur për sqarime ambasadorin rus, ndërsa presidenti Nicușor Dan kërkoi mbledhjen e Këshillit Suprem të Mbrojtjes.
