Tre anije tregtare të huaja që operonin në korridorin detar të Detit të Zi u sulmuan natën e 29 majit nga dronë rusë, njoftoi Zëvendëskryeministri ukrainas dhe Ministri i Rehabilitimit dhe Zhvillimit të Komuniteteve dhe Territoreve, Oleksiy Kuleba. Në një postim në Telegram, Kuleba shpjegoi se “gjatë natës, dronët armik sulmuan tre anije tregtare të huaja që operonin në korridorin detar. Sulmet shkaktuan zjarre në anije, të cilat u shuan nga ekuipazhet”.
Sipas njoftimit, dy anëtarë të ekuipazhit të një anijeje në pronësi turke, e regjistruar me flamur të Vanuatu-s, u plagosën lehtë. Ata morën ndihmë mjekësore, ndërsa anija u tërhoq për riparime. Për pjesën tjetër të incidentit, Kuleba raportoi se zjarret e shkaktuara nga sulmet u shuan nga vetë ekuipazhet, pa dhënë detaje të tjera rreth llojit të dëmeve të tjera materiale apo gjendjes së anijeve të tjera të përfshira.
Ministri theksoi se pavarësisht sulmeve të vazhdueshme, Ukraina vazhdon të ruajë funksionimin e korridorit detar dhe se portet së bashku me ekuipazhet vazhdojnë të sigurojnë transportin e ngarkesave. “Pavarësisht sulmeve të vazhdueshme ruse, Ukraina ruan funksionimin e korridorit detar dhe portet së bashku me ekuipazhet vazhdojnë të sigurojnë transportin e ngarkesave dhe sigurinë globale ushqimore”, shkroi Kuleba në postim.
Njoftimi vë në dukje se këto incidente rrisin shqetësimet lidhur me sigurinë e lundrimit në Detin e Zi. Rajoni mbetet një pikë kyçe për eksportet ukrainase të grurit dhe mallrave të tjera drejt tregjeve ndërkombëtare, dhe sulmet ndaj anijeve tregtare në korridorin detar janë paraqitur si kërcënim ndaj këtij funksionimi. Informacioni u publikua nga Top Channel.
