Tetë persona janë arrestuar në Britani si pjesë e një hetimi të NCA-së mbi një rrjet ndërkombëtar burrash që dyshohet se drogonin dhe abuzonin seksualisht gra. Agjencia Kombëtare e Krimit (NCA), e cila heton krimin e organizuar ndërkombëtar dhe veprat e rënda penale, njoftoi se hetimi zbuloi një rrjet kryesisht mashkullor që dyshohet se ka organizuar sulme seksuale ndaj grave duke i vënë ato nën ndikimin e lëndëve narkotike.
Rasti riktheu në vëmendje çështjen e francezes Gisèle Pélicot, e cila për vite me radhë drogohej nga bashkëshorti i saj, Dominique Pélicot, i cili më pas ftonte burra të panjohur ta përdhunonin pa dijeninë e saj. Pas gjyqit të Dominique Pélicot, janë zbuluar shumë raste të ngjashme në vende të ndryshme të Evropës, veçanërisht në Gjermani dhe Holandë.
Hetimi i NCA-së nisi pasi gazetarë gjermanë në vitin 2025 zbuluan një forum online ku shkëmbeheshin materiale dhe informacione lidhur me këto krime. Pas kësaj NCA identifikoi atë që e përshkroi si “një rrjet ndërkombëtar”, me anëtarë në dhjetëra vende dhe në të gjitha kontinentet. Platforma që shërbente si mjet komunikimi nuk është bërë publike; hetimi i saj çoi në arrestimet në Britani, ndërsa 14 hetime të tjera janë në zhvillim, si në Mbretërinë e Bashkuar ashtu edhe në vende të tjera.
Sipas autoriteteve, janë identifikuar më shumë se 270 persona të lidhur me këtë forum. Zëvendësdrejtori i NCA-së, Nigel Leary, deklaroi: “Sulmet seksuale të lehtësuara nga përdorimi i drogës nuk janë më incidente të izoluara, por po bëhen gjithnjë e më të organizuara.” Ai shtoi se fenomeni po favorezohet nga platformat dixhitale dhe theksoi se “shkalla e këtij fenomeni që kemi parë deri tani është thellësisht shqetësuese”.
Hetimet vazhdojnë ndërkombëtarisht, me fokus te ndjekja e pjesëmarrësve në forum, identifikimi i viktimave dhe shpërndarja e materialeve që lidhen me sulmet. NCA vazhdon bashkëpunimin me autoritete dhe media nga vende të ndryshme për të zbardhur rrjetin dhe për të çuar përpara procedimet penale.
