Fotografia fituese e konkursit vjetor të promovuar nga revistat shkencore BMC Zoology dhe BMC Ecology and Evolution shfaq një pilivesë me sytë e mëdhenj që dallohen përmes vrimave të një gjetheje. Konkursi vlerëson imazhet që pasqyrojnë bukurinë dhe diversitetin e jetës në Tokë, ndërsa evidenton punën e studiuesve që kontribuojnë në kuptimin dhe ruajtjen e natyrës.
Fituesi i parë, me titullin “Dritare mbi Ligatinat”, është Sritam Kumar Sethy, student në Universitetin Berhampur në Indi. Përmes imazhit ai ofron një vështrim në biodiversitetin shpesh të anashkaluar të ujërave të ëmbla. Teksti shpjegon se pilivesat janë grabitqarë të rëndësishëm në ekosistemet e ligatinave dhe konsiderohen tregues të shëndetit të ekosistemeve.
Në vendin e dytë u rendit Ryan Wagner nga Universiteti Shtetëror i Uashingtonit; fotografia tregon dy studentë në terren gjatë një nate me shi pranë Portlandit, Oregon, duke vendosur një transmetues radioje mbi një bretkosë për të studiuar lëvizjet e saj.
Kategorinë “Marrëdhënie në Natyrë” e fitoi Victor Huertas nga Universiteti James Cook në Australi me një imazh të dy sepjeve gjigante meshkuj që konkurrojnë për një femër.
Çmimi në kategorinë “Hulumtim në Veprim” shkoi për Liam Brennan nga Universiteti i New Brunswick në Kanada; ai paraqiti një fotografi të studentëve universitarë që studiojnë popullatat lokale të peshqve nën dritën e hënës, në ujërat e cekëta bregdetare të provincës.
Në kategorinë “Mbrojtja e Planetit Tonë” çmimin e parë mori Allen Tian, studiues në Universitetin Queen’s në Ontario, me një fotografi stereoskopike të realizuar me dron mbi Long Sault Parkway, në skajin perëndimor të rrugës ujore të lumit St. Lawrence. Imazhi pasqyron ndikimin mjedisor të ndërtimit të një dige në të kaluarën dhe rimëkëmbjen ekologjike që mund të vijë si rezultat i përpjekjeve për ruajtjen e natyrës.
Sipas organizatorëve, përmes këtyre fotografive konkursi synon të tregojë jo vetëm bukurinë e botës së egër, por edhe lidhjen mes kërkimit shkencor, biodiversitetit dhe përpjekjeve për mbrojtjen e planetit. (Ansa)
