Padia e dorëzuar në Gjykatën Supreme të Qarkut të Nju Jorkut nga një paditës anonim i identifikuar si “John Doe” pretendon se Lorna Hajdini, 37-vjeçare me origjinë shqiptare, ka detyruar për muaj me radhë një bankier të martuar të përfshihet në “akte seksuale jo konsensuale dhe poshtëruese”. Sipas dokumenteve ligjore, ngjarjet dyshohet të kenë nisur në pranverën e vitit 2024, menjëherë pasi të dy filluan të punonin së bashku.
Paditësi thotë se fillimisht Hajdini bëri komente dhe prekje të papërshtatshme, të cilat më pas u përshkallëzuan në propozime të drejtpërdrejta seksuale dhe kërcënime për pasoja profesionale në rast refuzimi. Padia përshkruan një seri incidentesh në të cilat Hajdini dyshohet se i ka kërkuar favore seksuale në këmbim të avancimit në karrierë, ka përdorur gjuhë fyese dhe raciste dhe ka ushtruar presion të vazhdueshëm mbi punonjësin. Në disa raste, sipas pretendimeve, ajo e ka detyruar atë të kryejë akte seksuale kundër vullnetit të tij.
Dokumentet përmendin gjithashtu pretendimin se Hajdini ka përdorur substanca për ta bërë paditësin të paaftë gjatë takimeve dhe se edhe ka pranuar këtë veprim. Paditësi pretendon po ashtu se ajo ka përdorur pozitën e saj për të aksesuar në mënyrë të paautorizuar llogarinë e tij bankare.
Përveç akuzave ndaj individit, padia akuzon edhe JP Morgan për neglizhencë dhe hakmarrje, duke pretenduar se kompania nuk mori masa ndaj sjelljes së supozuar dhe, përkundrazi, e vendosi punonjësin në pushim të pavullnetshëm dhe dëmtuar reputacionin e tij pasi ai raportoi incidentet. Një zëdhënës i bankës ka deklaruar se një hetim i brendshëm nuk gjeti prova që mbështesin akuzat dhe se paditësi nuk bashkëpunoi me procesin dhe nuk ofroi fakte të mjaftueshme.
Rasti mbetet në shqyrtim. As Hajdini, as përfaqësues të saj nuk kanë reaguar publikisht ndaj akuzave, sipas dokumentacionit të paraqitur në gjykatë.
