Drejtori i Policisë së Shtetit, Skënder Hita, ka dërguar urdhëra të reja ndaj vartësve, me theks të veçantë te shkollat. Policia e Shtetit ka shpërndarë një dokument zyrtar për të gjitha drejtoritë vendore, në të cilin pranon se pranë dhe brenda institucioneve arsimore situata me drogën dhe armët e ftohta është kthyer në një problem serioz sigurie. Dokumenti, i firmosur nga Hita, bën pasqyrimin e ngjarjeve të regjistruara gjatë vitit shkollor 2024-2025 brenda dhe pranë shkollave.
Sipas dokumentit, nxënës janë kapur në posedim të lëndëve narkotike, armëve të ftohta dhe sendeve të tjera të ndaluara, dhe ka pasur raste me pasoja. Raportohet gjithashtu se strukturat policore nuk kanë siguruar në kohë informacionin lidhur me shpërndarjen e drogës pranë institucionëve arsimore dhe nuk kanë zhvilluar kontrolle efektive. Në dokument vihet në dukje mungesa e bashkëpunimit mes policisë dhe drejtuesve të shkollave, si dhe me oficerët e sigurisë që punojnë pranë institucioneve arsimore.
Si pasojë e këtyre vlerësimeve, drejtoria e përgjithshme e Policisë së Shtetit ka urdhëruar masa emergjente të zbatueshme në të gjithë vendin. Në kuadër të këtyre masave parashikohet angazhimi i agjentëve të policisë kriminale pranë shkollave, organizimi i kontrolleve të befasishme nga njësitë antidrogë dhe forcave operacionale, si dhe kapja në flagrancë e personave që shpërndajnë drogë pranë institucioneve arsimore.
Dokumenti kërkon po ashtu intensifikimin e metodave speciale hetimore dhe përfshirjen e strukturave të krimit ekonomik me qëllim ndalimin e shitjes së produkteve të ndaluara për të miturit. Urdhërimet synojnë ndërhyrje të koordinuara dhe shtim të pranisë së tyre operative në zonat e afërta me shkollat, me qëllim parandalimin dhe goditjen e rasteve të lidhura me drogën, armët e ftohta dhe sende të ndaluara mes të miturve. Top Channel.
