Në puntatën e 7 tetorit, emisioni investigativ Fiks Fare publikoi fakte të reja lidhur me dosjen Balluku. Në qendër të raportimit janë vendosur pretendimet për presion dhe kërcënime që, sipas dëshmisë së ish-vartëses së saj në Ministrinë e Infrastrukturës, Mirzeta Kashnica, i janë ushtruar asaj nga persona të lidhur me grupin Balluku. Kashnica ka dëshmuar për kërcënimet që, sipas saj, i janë bërë nga këta persona.
Pas publikimit, qytetarë të shumtë shfaqën reagime të ashpra dhe kërkuan që SPAK-u të ndërmarrë hapa të mëtejshëm në hetimin e çështjes. Disa prej komenteve që u përmendën në mbledhjen e reagimeve janë: “SPAK-u duhet ta arrestojë, jo t’i heqë imunitetin”, “Në burg duhet të ishte Belinda”, “Belinda Balluku është një hajdute ordinere” dhe “S’ka shtet. Dy zv/kryeministra akuzohen nga SPAK-u dhe asnjë nuk arrestohet”. Të tjerë lidhin emrin e Ballukut me korrupsion dhe pasuri të dyshimta, duke thënë se ajo ka vjedhur dhe duhet që pasuria t’i merret: “T’ia marrim pasurinë dhe t’ua japim të varfërve”, “Kjo nuk la gjë pa vjedhur: 300 apartamente”.
Përtej akuzave për intimidim dhe presion ndaj dëshmitarëve të drejtësisë, protestuesit theksuan se skandalet më të mëdha lidhen me dhënien e tenderave, ku pretendohet se ish-zëvendës-kryeministria ka caktuar fituesin para garës. Në reagimet e mbledhura dëgjoheshin thirrje të herëpashershme për heqjen e imunitetit dhe arrestimin e saj “sa më shpejt”, si dhe deklarata që e identifikojnë Ballukun si “maja e korrupsionit shqiptar”.
Një numër i madh protestuesish para dyerve të Parlamentit nuk kërkuan vetëm gjykimin e Belinda Ballukut, por edhe ndryshimin e qeverisë Rama. Reagimet shfaqën zemërim të gjerë ndaj asaj që qytetarët e përshkruan si largim nga drejtësia dhe përgjegjësi institucionale, duke përsëritur kërkesa për hetim të plotë dhe masa nga autoritetet e drejtësisë. Top Channel.
