Tubimi qytetar përpara Kryeministrisë u zhvillua për të 26-ën ditë, me kërkesën kryesore për dorëheqjen e kryeministrit Edi Rama dhe të gjithë klasës politike. Në bulevardin “Dëshmorët e Kombit” organizatorët lexuan përsëri pesë kërkesat kryesore të protestës, ndërsa në podiumin poshtë zyrës së kryeministrit u ngjitën disa emigrantë që shprehën mbështetje për lëvizjen.
Kërkesat e protestuesve përfshijnë:
1) Dorëheqjen e panegociueshme të kryeministrit dhe të qeverisë.
2) Formimin e një qeverie teknike tranzitore, jopartiake, me mandat 12-mujor.
3) Ndryshime kushtetuese që sigurojnë barazi të të gjithë shtetasve para ligjit dhe miratimin e ndryshimeve me referendum popullor. Si pjesë e këtij paketi përmenden ndryshimi i Kodit Zgjedhor, ndryshimi i ligjit për financimin e partive politike dhe organizatave të ndryshme, si dhe kufizimi i ushtrimit të detyrës së kryeministrit në jo më shumë se dy mandate, të plota ose të pjesshme, gjatë gjithë jetës politike të një individi.
4) Në mënyrë paralel, anulimin e ndryshimeve të bëra në ligjin për “Zonat e Mbrojtura” dhe në ligjin për “Trashëgiminë kulturore”; shfuqizimin e paketës ligjore të njohur si “Paketa e Maleve”; dhe shfuqizimin e statusit dhe kuadrit ligjor për “Investimet Strategjike”.
5) Hartimin e një kontrate të re sociale mes qytetarëve dhe shtetit pas konsultimeve me intelektualë, ekspertë teknikë dhe qytetarë apartiakë të propozuar nga sheshi i protestës.
Nga sheshi u dërgua edhe një mesazh për shqiptarët në Kosovë e më gjerë. Mes propozimeve për përshkallëzim, dominuan thirrjet për të vazhduar rezistencën në mënyrë paqësore. Gjatë ditës së 26, protestuesit shfaqën edhe mesazhe të shkruara në murin e godinës qeveritare, si “Shqipëria nuk është në shitje” dhe “Larg duart nga zonat e mbrojtura”. Me pankarta dhe thirrje për largimin e politikës, qytetarët përmbyllën ndarjen e ditës së 26 me një marshim nëpër rrugët kryesore të kryeqytetit.
