Në ditën e 10-të të bllokimit të Koridorit VIII, punimet vazhdojnë me intensitet të plotë për të rikthyer aksesueshmërinë në një nga akset rrugore më të rëndësishme të vendit. Aktualisht, ka përfunduar devijimi i lumit Shkumbin në anën e tij të majtë, dhe ka nisur sistemimi i terrenit për bypass-in provizor 1.3 km që do të mundësojë lëvizjen e automjeteve.
Gjatë së shtunës, janë vendosur dy sonda për studimin gjeologjik dhe dy të tjera do të vendosen sot. Këto hapa janë të rëndësishëm për të siguruar stabilitetin e terrenit për ndërtimin e infrastrukturës së ri. Projektuesi ka përgatitur tashmë tri propozime, dhe grupi teknik do të vendosë se cila prej tyre do të zgjidhet mëngjesin e së hënës.
Përzgjedhja e projektit do të përcaktojë edhe afatet për zbatimin e punimeve. Pritet që pasditja e së hënës të sjellë një parashikim të ri mbi hapjen e qarkullimit në Koridorin VIII, duke ofruar një zgjidhje për situatën aktuale.
