Më 5 shtator shënohet përvjetori i 28-të i vdekjes së humanistes shqiptare, Shën Nënë Tereza, fituese e Çmimit Nobel për Paqe. Ajo është një figurë e njohur dhe e dashur nga shumë njerëz për veprat e saj të përkushtuar ndaj bamirësisë dhe ndihmës së të varfërve.
Nënë Tereza, e lindur si Anjezë Gonxhe Bojaxhiu më 26 gusht 1910 në Shkup, u bë murgeshë katolike dhe kaloi pjesën më të madhe të jetës së saj në Indi. Fjalët e saj, “Me gjak, unë jam shqiptare. Me shtetësi, jam indiane. Me besim, unë jam një murgeshë Katolike”, reflektojnë identitetin e saj të veçantë dhe përkushtimin ndaj të tjerëve.
Pas vdekjes së saj më 5 shtator 1997, Nënë Tereza u shenjtërua në një ceremoni solemne në Sheshin “Shën Pjetri” në Vatikan më 5 shtator 2016, nga Papa Françesku. Dy mrekulli të njohura ishin çelësi për këtë shenjtërim. E para ishte dëshmia e Monika Besra, një nënë e pesë fëmijëve, e cila pretendonte se falë lutjeve para ikonës së Nënë Terezës, u shërua nga një tumor në stomak. Mrekullia e dytë erdhi nga një 25-vjeçar brazilian, i cili konfirmoi se u shërua nga një tumor në tru përmes ndërhyrjes së Nënë Terezës.
Papa Gjon Pali II e nderoi Nënë Terezën në tetor të vitit 2003, duke miratuar mrekullinë e parë pas vdekjes së saj, duke theksuar ndikimin e saj të thellë në botë. Asambleja e Përgjithshme e Kombeve të Bashkuara vendosi që 5 Shtatori të shpallet si Dita Ndërkombëtare e Bamirësisë, një nderim për kontributin e vigjilencës së saj në ndihmën ndaj të varfërve.
Nënë Tereza vazhdon të mbetet një simbol i shpresës dhe humanizmit, duke frymëzuar breza të tërë me përkushtimin e saj për të mirë, dashurinë dhe ndihmën ndaj njerëzve në nevojë. Jehonën e saj e ndjenë jo vetëm shqiptarët, por edhe gjithë bota.
