Policia ka proceduar penalisht në gjendje të lirë një grup prej nëntë protestuesish që mbetën në orët e para të mëngjesit para Kryeministrisë pas tubimit të ditës së djeshme. Në njoftimin zyrtar thuhet se strukturat e Policisë së Tiranës kanë proceduar penalisht në gjendje të lirë 9 shtetas, të cilët, pas përfundimit të tubimit më datë 20.06.2026, rreth orës 22:00, kanë vijuar qëndrimin në mënyrë të kundërligjshme në bulevardin “Dëshmorët e Kombit”, duke penguar qarkullimin e automjeteve dhe duke prishur qetësinë publike.
Shtetasit e proceduar janë: Sh. G., 32 vjeç; A. G., 56 vjeç; A. B., 25 vjeç; V. K., 28 vjeç; G. K., 30 vjeçe; A. K., 43 vjeç; E. S., 36 vjeç; A. K., 34 vjeç; dhe R. Sh., 22 vjeç. Njoftimi sqaron se këta persona kanë qëndruar përtej orarit të njoftuar për zhvillimin e tubimit dhe kanë zaptuar hapësirën publike, duke vendosur karrige metalike dhe sende të tjera në bulevard.
Pavarësisht thirrjeve të përsëritura të punonjësve të Policisë për lirimin e hapësirës së zënë dhe respektimin e dispozitave ligjore, ata kanë refuzuar të largohen dhe kanë vijuar qëndrimin në këtë zonë. Policia njofton se vijon puna për identifikimin e shtetasve të tjerë përgjegjës për veprime të kundërligjshme gjatë tubimit.
Materialet procedurale do t’i referohen Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprat penale “Pengimi i qarkullimit të mjeteve të transportit”, “Prishja e qetësisë publike” dhe “Organizimi dhe pjesëmarrja në grumbullime të paligjshme”. Burimi i njoftimit është Top Channel.
