Një grua 56-vjeçare nga Britania, Wendy Duffy, i ka dhënë fund jetës përmes eutanazisë së asistuar në Zvicër, megjithëse fizikisht e shëndetshme dhe mendërisht e aftë. Vendimi i saj pason vdekjen tragjike të fëmijës së vetëm në një aksident, ngjarje që ajo thotë se i ka hequr jetës kuptimin dhe ka lënë një dhimbje dhe boshllëk të vazhdueshëm. Në një rrëfim për Daily Mail, Duffy shpjegon se pas një viti reflektimi dhe përpjekjesh për ta përballuar situatën, ka marrë një vendim të ndërgjegjshëm dhe përfundimtar: “Dua të vdes dhe kjo është ajo që do të bëj. Jeta ime, zgjedhja ime.”
Ajo ka informuar familjarët për synimin e saj, por pa dhënë detaje mbi kohën e udhëtimit, me arsyetimin e mbrojtjes së tyre nga pasojat e mundshme ligjore në Mbretërinë e Bashkuar. Kërkesa e saj është shqyrtuar nga klinika zvicerane Pegasos, ku një komision, përfshirë psikiatër, i ka dhënë miratimin pas një procesi të gjatë vlerësimi dhe shqyrtimi të historisë së saj mjekësore. Raportohet se Duffy kishte tentuar më parë të vetëvritej, pa sukses, dhe kjo përpjekje e mëparshme e ka shtyrë që të kërkojë një procedurë të kontrolluar dhe ligjore jashtë vendit.
Klinika Pegasos është përmendur si organizatë jofitimprurëse, ku pacientët mbulojnë kostot e trajtimeve dhe procedurave përkatëse. Wendy ka vendosur ta ndajë publikisht historinë e saj pak para udhëtimit, duke e përshkruar vendimin si rezultat të një procesi të gjatë reflektimi personal dhe si një zgjedhje të vetëdijshme. Artikulli thekson se, pavarësisht aftësisë së saj fizike dhe mendore, humbja e fëmijës ishte përcaktuese për vendimin për t’u nënshtruar eutanazisë së asistuar në Zvicër.
