Hetimi i SPAK nën akuzat e sulmeve kibernetike me origjinë nga kampi i muxhahedinëve në Manëz zbulon se ky kamp nuk ishte fushë me lule për të gjithë iranianët e strehuar atje.
Sipas SPAK, nga 3 mijë muxhahedinë që u strehuan në 2018-n në këtë kamp, 450 prej tyre u arratisën. Nga këta, 300 janë larguar ilegalisht nga vendi ynë, 100 të tjerë kanë kaluar kufirin me dokumentacion të rregullt, ndërsa 50 të tjerë qëndrojnë në Tiranë.
Një pjesë e të arratisurve nga kampi kanë folur për mediat prej kohësh. Tre prej tyre në shkurt të 2018-s folën për Fiks Fare, duke deklaruar se MEK funksiononte si një kult me rregulla strike, që u ndalonin krijimin e një familjeje.
Sipas tyre, MEK jo vetëm që nuk ka lidhje me lirinë e demokracinë, por funksionon si një organizatë e mirëfilltë okulte me metoda që bien ndesh me parimet që ajo propagandon në rrjet.
Ndërkohë, në të njëjtin njoftim të SPAK nuk përjashtohen as dyshimet se brenda kampit ka pasur aktivitet terrorist. Zyrtarisht prokurorët e posaccëm ende nuk e kanë ngritur akuzën e terrorizmit, por me thellimin e hetimeve dhe ekspertimin e pajisjve elektronike të sekuestruara nga muxhahedinët kjo akuzë nuk përjashtohet.
