Projektligji që ndryshon ligjin nr. 66/2023 parashikon që objektet e konfiskuara për shkelje të lejeve të ndërtimit të përfundojnë nga shteti dhe më pas t’u dorëzohen personave që kanë lidhur kontrata porosie, sipërmarrjeje ose premtim-shitjeje me ndërtuesit dhe zhvilluesit. Kryeadministratorja e Agjencisë së Administrimit të Pasurive të Sekuestruara dhe të Konfiskuara (AAPSK), Risena Xhaja, shpjegoi para Komisionit parlamentar për Shëndetësinë dhe Mirëqenien Sociale se ndryshimi adreson mungesën e legjislacionit aktual, i cili parashikon vetëm konfiskimin e objektit pa detyrim për përfundimin e punimeve.
Draftligji parashikon ngritjen e një grupi pune që do të kontrollojë kontratat e lidhura përpara noterit për të identifikuar përfituesit e ligjshëm. Paralelisht, AAPSK do të kryejë vlerësimin e gjendjes fizike të objekteve për të përcaktuar nivelin e investimit të realizuar dhe punimet që mbeten për t’u përfunduar; më pas do të nisë prokurimi për projektimin dhe përfundimin e ndërtimeve. Të ardhurat nga shitja e pasurive të konfiskuara do të përdoren për financimin e përfundimit të punimeve në objektet e papërfunduara.
Xhaja theksoi se financimi për familjet që përfitojnë nga programet e strehimit social rregullohet nga legjislacioni përkatës, ndërsa projektligji përcakton mekanizma të rinj për administrimin dhe përfundimin e ndërtimeve të konfiskuara. Aktualisht, sipas saj, 16 objekte i nënshtrohen procedurës së parablerjes në kuadër të ligjit nr. 66/2023. Bazuar në ndryshimet, të drejtën e parablerjes do ta kenë vetëm subjektet që kanë tejkaluar lejen e ndërtimit, jo subjektet që kanë ndërtuar tërësisht pa leje.
Mekanizmi i parashikuar do të funksionojë mbi kërkesat që Ministria e Ekonomisë do të paraqesë për nevojat e strehimit social; AAPSK do të identifikojë pasuritë e disponueshme dhe përshtatshmërinë e tyre, ndërsa kalimi te Ministria do të bëhet me vendim të Këshillit të Ministrave. Një ndryshim tjetër përfshin përjashtimin e investitorëve nga përfitimi i pasurive të konfiskuara për të parandaluar që subjektet e përfshira në zhvillimin e ndërtimeve të përfitojnë nga ato pasuri. Procedurat e legalizimit nuk janë pjesë e projektligjit; subjektet duhet të vetëdeklarojnë situatën e tyre, dhe rastet që nuk përfshihen nga legjislacioni përkatës do të trajtohen sipas procedurave të konfiskimit.
