Personi i dyshuar që sulmoi një pikë kontrolli sigurie në Darkën e Korrespondentëve të Shtëpisë së Bardhë, duke detyruar Presidentin Donald Trump të evakuohej, është identifikuar si Cole Tomas Allen, thanë për CNN tre burime të njohura me çështjen. I dyshuari është 31 vjeç nga Kalifornia, ka studiuar inxhinieri dhe është i diplomuar në Institutin e Teknologjisë së Kalifornisë (Caltech), sipas materialeve të ndara me CNN.
Autoritetet bëjnë të ditur se i dyshuari besohet të ketë qenë mysafir në hotelin Washington Hilton, ku ndodhi incidenti. Policia “siguroi një dhomë” për të përcaktuar se çfarë përmbante, tha Shefi i Përkohshëm i Departamentit të Policisë Metropolitane, Jeffery Carroll. Carroll tha gjithashtu se i dyshuari ishte i armatosur me një pushkë gjahu, një pistoletë dhe disa thika, dhe se “shkëmbeu zjarr” me oficerët kur u ndalua dhe u mor në paraburgim.
Një foto që duket të kapë momentet pas arrestimit u postua në llogarinë “Truth Social” të Presidentit Trump dhe tregon të dyshuarin në tokë me të dyja duart pas shpinës. Autoritetet thanë se i dyshuari nuk ishte qëlluar me armë zjarri, por u dërgua në spital për vlerësim dhe trajtim. Një agjent i Shërbimit Sekret u plagos dhe u dërgua gjithashtu në spital, sipas kryebashkiakes së Uashingtonit, Muriel Bowser.
Prokurorja amerikane Jeanine Pirro njoftoi se i dyshuari do të paraqitet në gjykatë të hënën, me dy akuza: përdorimin e një arme zjarri gjatë një krimi dhune dhe sulmin ndaj një oficeri federal duke përdorur një armë të rrezikshme. Shefi i policisë së DC tha se i dyshuari dukej të ishte “një aktor i vetmuar”, ndërsa Trump deklaroi se ekipi i tij i sigurisë nuk kishte qenë në dijeni të ndonjë kërcënimi para darkës.
Drejtori i FBI-së, Kash Patel, tha se hetuesit do të shqyrtojnë “me kujdes” të kaluarën e të dyshuarit. Sipas të dhënave publike, i dyshuari punonte si mësues dhe si zhvillues videolojërash nga Kalifornia Jugore.
