Janë zbardhur detaje të reja nga aksidenti i rëndë që ndodhi mbrëmjen e sotme në Rrugën e Arbrit.
Policia sqaroi se në aksident janë përfshirë dy mjete, të cilat janë përplasur kokë më kokë.
Dyshohet se mjeti tip ‘Mercedes Benz 240’ ku udhëtonin Kujtim dhe Murat Istrefi me dy bashkëshortet Lulzime dhe Firuze Istrefi, ka dalë nga një rrugë dytësore nga fshati Gjoricë, ku kishin qenë për vizitë, dhe në momentin që kanë dalë në rrugën nacionale i kanë prerë rrugën mjetit tjetër tip ‘Mercedez’ me targa angleze. Si pasojë e shpejtësisë së madhe përplasja ka qenë shumë e fuqishme dhe mjeti ku udhëtonin viktimat është ndarë në dy pjesë.
Si pasojë e përplasjes së dy mjeteve, kanë humbur jetën 3 persona dhe kanë mbetur të plagosur 4 të tjerë. Dy prej viktimave janë identifikuar si Kujtim dhe Murat Istrefi vëllezër, nga Maqellara.
Sipas njoftimit të Policisë, vëllezërit kanë humbur jetën në vendngjarje, ndërsa 45-vjeçarja Lulzime Istrefi (Dehari) ka ndërruar jetë në spital.
Po ashtu sqarohet se katër të plagosurit janë dërguar për në spital dhe po marrin ndihmën mjekësore.
Tre nga të plagosurit Mërgim Lazri 25 vjeç, Edison Lazri 20 vjeç, Kadrie Markeçi, 19 vjeç, ishin në mjetin tip Mercedes me targa angleze, ndërsa Firuze Istrefi 56 vjeç është bashkëshortja e një prej viktimave që ishte në mjetin tjetër. Policia po punon për zbardhjen dhe dokumentimin e plotë të ngjarjes.
Të vdekur:
1. Kujtim Istrefi (Dehari) – 57 vjeç (Maqellarë – Dibër)
2. Murat Istrefi (Dehari) – 76 vjeç (Maqellarë – Dibër)
3. Lulëzime Istrefi (Dehari) – 45 vjeç (Maqellarë – Dibër)
Të plagosur:
1. Mërgim Lazri – 25 vjeç (Bllatë e Epërme – Dibër)
2. Edison Lazri – 29 vjeç (Bllatë e Epërme – Dibër)
3. Firuze Istrefi – 56 vjeç (Maqellarë – Dibër)
4. Kadrie Markeçi – 19 vjeç (Shupenzë -Dibër)
