Autoritetet në Monako kanë lëshuar një urdhër arresti për personin e dyshuar si organizator i sulmit me bombë ndaj një biznesmeni ukrainas disa ditë më parë, ndërsa Interpoli ka nxjerrë një kërkesë për “njoftim të kuq” për arrestimin e tij kudo që të ndodhet. Sipas Reuters, njoftimi i kuq është një kërkesë për bashkëpunim midis autoriteteve policore dhe nuk përbën vetë një urdhër arresti ndërkombëtar.
Zyra e prokurorit në Monako njoftoi se një i dyshuar është identifikuar në hetimin mbi atentatin e mbetur në tentativë, i cili ndodhi të hënën në mbrëmje dhe la të plagosur tre persona. Prokurori i Përgjithshëm i Monakos, Stéphane Thibaut, vlerësoi bashkëpunimin ndërkombëtar dhe punën e shërbimeve të sigurisë, duke theksuar se identifikimi i të dyshuarit u bë në një kohë shumë të shkurtër. Autoritetet thanë se pajisja shpërthyese ishte vendosur brenda një qeseje ose pakete të lënë pranë hyrjes së objektit.
Sipas mediave franceze, përfshirë Le Figaro, personi kryesor i dyshuar është një grua rreth të tridhjetave, e kapur nga kamerat e sigurisë duke u larguar me veshje të errët dhe kapelë të zezë. Ajo dyshohet se kishte qëndruar gjatë në një stol para ndërtesës përpara se të vendoste pajisjen dhe të largohej drejt Beausoleil, në Francë pranë kufirit me Monakon.
Autoritetet nuk kanë konfirmuar zyrtarisht identitetin e objektivave, por burime pranë hetimeve përmendin biznesmenin 58-vjeçar Vadim Ermolaev, me shtetësi qipriote, si një nga shënjestrat e mundshme, së bashku me familjarët e tij. Ermolaev, i vendosur në Monako që nga viti 2021, ishte vendosur nën sanksione nga Ukraina në dhjetor 2023 për aktivitetet e tij të biznesit në Krime.
Djali i biznesmenit është në trajtim në një spital në Nisë, ndërsa dy të rritur të tjerë janë shtruar në spitalin universitar të qytetit; sipas raportimeve, gjendja e njërit prej të plagosurve është kritike, ndërsa tjetri është jashtë rrezikut për jetën. Rreth 50 zjarrfikës dhe dhjetëra efektivë policie u angazhuan në operacionin e emergjencës.
Hetuesit po shqyrtojnë disa pista, përfshirë konflikte të mundshme të lidhura me rrjete mashtrimi online dhe aktivitete të dyshimta biznesi në Ukrainë dhe jashtë saj. Sipas burimeve, djali i biznesmenit është përfshirë më parë në çështje që lidhen me rrjete qendrash telefonike të dyshuara për mashtrime investimesh, por nuk ka konfirmim zyrtar për lidhje të drejtpërdrejtë me ngjarjen. Hetimet vazhdojnë dhe nuk ka përfundime përfundimtare mbi motivin e sulmit.
