Në Maliq u prezantua një ekspozitë fotografike dhe dokumentare që paraqet dhjetra dëshmi vizuale dhe shënime ditari nga periudha e Luftës Italo-Greke (1940–1941), realizuar nga arkeologu dhe ushtari arvanitas Kristo Petro Mesogjitis. I emëruar si përkthyes i trupave greke në zonën e Maliqit e Gorës, Mesogjitis bleu një aparat fotografik në Korçë dhe me të ka kapur jetën e përditshme, njerëzit, fshatrat dhe relievin e zonës. Rreth 70 fotografi të ekspozuara, së bashku me faksimile nga ditari i tij, pasqyrojnë jo vetëm elemente ushtarake, por edhe pamje nga fshatrat e Maliqit, Pogradecit dhe veçanërisht Maliqit, ku ishte komanda e trupave greke për këtë rajon.
Në ditarin dhe materialet e tij, Mesogjitis dokumenton gjithashtu studime mbi kulturën popullore dhe zakonet e shqiptarëve, përfshirë arredimin e shtëpive dhe tradita që ai i konsideronte të ngjashme me ato të arvanitasve. Ekspozita përfshin edhe faksimile nga këngët e arvanitasve dhe fotografi që lidhen me këtë komunitet, një pjesë e të cilave paraqiten në ekspozitë.
Ngjarjen e solli ish-kryebashkiaku i Saronikos në Greqi, Petro Filipu, i cili riktheu vëmendjen te rëndësia e këtij arkivi. Filipu theksoi se Mesogjitis, që u nda nga jeta në vitin 1945, ishte ushtar dhe përkthyes në frontin greko-italian dhe si arvanitas, duke ditur shqip, ishte i angazhuar në përkthimin e kontakteve midis trupave dhe popullatës civile. Ai solli edhe fjalët e Mesogjisit për popullin shqiptar: “Populli shqiptar është një popull shumë i vuajtur, të cilin e kanë shfrytëzuar të huajt. Edhe sepse është një popull shumë i zgjuar, shumë punëtor dhe, nëse do t’i jepet shansi, me atë që ka, do të përparojë jashtëzakonisht.”
Dhora Dajko, drejtoreshë e Kulturës, vlerësoi ekspozitën si një dëshmi të kujtesës historike, respektit të ndërsjellë dhe njohjes së trashëgimisë së përbashkët kulturore. Ekspozita përfshin materiale vizuale dhe tekstuale që dokumentojnë aspekte ushtarake dhe joushtarake të jetës së përditshme në zonën e luftës, si dhe studimet etnografike të autorit mbi zakonet lokale.
