Detaje të reja mbi ngjarjen e dhunshme brenda familjes që çoi në plagosjen e rëndë me thikë të një 32-vjeçareje në Durrës. Ngjarja ndodhi në orët e para të ditës së sotme, rreth orës 3:00, në lagjen 16, në një godinë trekatëshe ku e plagosura jetonte me qira në katin e dytë. Ajo është nënë e dy fëmijëve dhe njihej në lagje si një grua e qetë që shkonte çdo ditë në punë; fëmijët jetonin te njerëzit e saj.
Një fqinjë e saj, që i dha ndihmën e parë, rrëfeu se dëgjoi thirrje për ndihmë dhe gjeti gruan të larë në gjak. Sipas dëshmisë, e plagosura arriti të zbriste shkallët vetë dhe ra pranë derës në katin e parë, ku fqinja njoftoi ambulancën dhe policinë. Fqinja tha se nuk e njohu menjëherë dhe nuk kishte parë më parë të hyjë ndonjë mashkull në atë shtëpi; ajo nuk kishte dijeni nëse autor ishte ish-bashkëshorti, por theksoi se e plagosura ishte divorcuar dhe se ish-burri jetonte në Elbasan.
Burime policore bëjnë me dije se nga hetimet rezulton se çifti Karaj ishte ndarë, por kishte tentuar të ribashkohej. Sipas këtyre burimeve, nata e kaluar përfundoi sërish me konflikt të dhunshëm dhe më pas me krim. Autor i dyshuar për plagosjen è ish-bashkëshorti i të plagosura, i identifikuar si Xhoni Karaj, 40 vjeç, i cili vazhdon të jetë në kërkim policor pasi dyshohet se u largua nga vendi i ngjarjes gjatë natës.
Forcat e policisë mbërritën menjëherë pas njoftimit, kanë kryer kontrolle dhe kanë marrë në pyetje persona për të zbardhur dinamikën e plotë të ngjarjes. E plagosura ndodhet në reanimacionin e spitalit të Durrësit, nën kujdesin e mjekëve. Lajmi është raportuar nga korrespondentja e Top Channel, Vali Qyrfyçi.
