‘PD nuk i duhet një kryetar me të shkuar të errët’ kështu ka deklaruar deputeti i PD, Arbi Agalliu në një intervistë për Report Tv me gazetarin Nertil Agalliu, duke nënkuptuar kështu Sali Berishën. Agalliu thekson se PD duhet të bëjë gjithçka për të plotësuar vakancat që i mungojnë, atë të liderit të demokratëve dhe kryetarit të grupit parlamentar dhe Berisha duhet të reflektojë duke lënë demokratët që të zgjedhin liderin pa bërë ndërhyrje.
Nuk duam individ që kanë pikëpyetje të mëdha, që kanë qenë të lidhur me korrupsionin e kanë të shkuar të errët. Berisha e ka zyrtarisht. Berisha është fatkeqësi e PD, është fatkeqësi e jona. Kemi dhënë gjithçka për të por besoj që forca e një lideri tregohet dhe me dorëheqje e tërheqje. Është momenti që Berisha të reflektojë duke i lënë shqiptarët e demokratët të zgjedhin liderin e tyre. Sa kohë nuk e bën por kërkon revolucion e protesta pavarësisht rezultatit zhgënjyes të mbajë gjallë shpresën e demokratëve. Fatkeqësisht shqiptarët duan qasje të re”, tha Agalliu.
Sa i përket rikthimit të Lulzim Bashës në politikën aktive, deputeti demokrat thotë se nuk ka dijeni nëse po planifikon të garojë për kreun e PD.
“Basha ka aktivitetin e vet. Nuk di të them nëse kthehet ose jo në krye të PD. Kushdo individ që plotëson kriteret për të kandiduar është i mirëpritur ta bëjë këtë gjë. Nëse Basha ose kushdo tjetër merr pëlqimin e anëtarësisë, është në të drejtën e tij. Basha ka bërë hap pas duke marrë përgjegjësinë pas zgjedhjeve të 6 marsit kur situata u tensionua”, tha Agalliu.
Mbetet për t’u parë se cilat do të jenë vendimet që do të merren të martën kur të mblidhet kryesia dhe grupi parlamentar i PD.
