Një denoncim i mbërritur në redaksinë e Timoni.al ngre një pretendim jashtëzakonisht të rëndë: rreth dhjetë ditë më parë, në Portin e Durrësit dyshohet se kanë hyrë rreth 25 tonë kokainë, që sipas burimit do të kontrollohej nga dy grupe të fuqishme kriminale të Durrësit.
Nëse ky informacion rezulton i vërtetë, bëhet fjalë për një nga rastet më serioze të trafikut të drogës të pretenduara ndonjëherë në territorin shqiptar.
Por pyetja kryesore është: a ka hyrë realisht kjo sasi droge në Portin e Durrësit dhe, nëse po, si ka qenë e mundur të kalojë kontrollet?
Një sasi e tillë nuk mund të trajtohet si një ngjarje e zakonshme kriminale. Ajo do të kërkonte një zinxhir të tërë logjistik, transport, dokumentacion, mjete të përshtatura për fshehjen e ngarkesës dhe, mbi të gjitha, kapërcimin e disa hallkave të kontrollit institucional.
Pikërisht këtu lindin pikëpyetjet për sigurinë dhe kontrollin në Portin e Durrësit.
Kush kontrollon hyrjen dhe daljen e kontenierëve?
Kush verifikon ngarkesat që vijnë nga Amerika Latine?
Sa kontrolle fizike kryhen dhe sa prej tyre bëhen përmes skanerëve?
A janë kontrolluar në mënyrë të veçantë ngarkesat që kanë mbërritur në port gjatë dhjetë ditëve të fundit?
A ka pasur sinjalizime nga partnerët ndërkombëtarë për ndonjë ngarkesë të dyshimtë?
Porti i Durrësit është përmendur edhe në raste të mëparshme të trafikut ndërkombëtar të kokainës. Për këtë arsye, çdo denoncim i ri për futjen e sasive të mëdha të narkotikëve duhet të merret seriozisht dhe të verifikohet nga institucionet përgjegjëse.
Në këtë histori përmendet edhe DEA amerikane, e cila sipas burimit dyshohet se është angazhuar në monitorimin e trafikut të kokainës që kalon përmes Shqipërisë.
Nëse kjo është e vërtetë, atëherë lind një tjetër pyetje: çfarë informacioni kanë partnerët amerikanë për aktivitetin e grupeve kriminale në Portin e Durrësit dhe a janë autoritetet shqiptare duke vepruar mbi këto të dhëna?
Pretendimi se pas kësaj sasie droge qëndrojnë dy grupe kriminale në Durrës është gjithashtu një çështje që kërkon verifikim të menjëhershëm nga Policia e Shtetit, Prokuroria e Posaçme dhe agjencitë partnere.
Nuk mund të thuhet pa prova se institucionet shqiptare apo zyrtarë të caktuar janë të përfshirë në trafikun e drogës. Por nëse një ngarkesë prej 25 tonësh kokainë do të kishte kaluar realisht përmes një porti të kontrolluar nga autoritetet shqiptare, atëherë përgjegjësia institucionale do të ishte një çështje që nuk mund të anashkalohej.
Si kaloi droga? Kush e kontrolloi ngarkesën? Kush firmosi dokumentet? Kush e autorizoi lëvizjen e kontenierëve? Kush kishte informacion paraprak?
Këto janë pyetjet që duhet t’u përgjigjen institucionet.
Në një kohë kur Shqipëria deklaron se lufta kundër krimit të organizuar dhe trafikut ndërkombëtar të narkotikëve është një prioritet dhe kur bashkëpunimi me Shtetet e Bashkuara dhe agjencitë amerikane të zbatimit të ligjit është një komponent i rëndësishëm i kësaj lufte, një denoncim i tillë nuk mund të mbetet thjesht një informacion anonim.
SPAK, Policia e Shtetit, Dogana, Autoriteti Portual i Durrësit dhe strukturat e tjera ligjzbatuese duhet të verifikojnë nëse kjo ngarkesë ka ekzistuar, nga ka ardhur, në çfarë date ka mbërritur, cilët operatorë ekonomikë kanë qenë të përfshirë dhe çfarë kontrollesh janë kryer.
Nëse denoncimi është i pavërtetë, institucionet duhet ta sqarojnë publikisht.
Nëse është i vërtetë, atëherë Shqipëria përballet me një alarm të jashtëzakonshëm të sigurisë dhe luftës kundër krimit të organizuar.
Dhe pyetja më e rëndë mbetet:
A po kontrollohet realisht Porti i Durrësit, apo për disa grupe kriminale trau është ngritur vetëm në letër?