Pesë persona u dënuan me më shumë se 14 vite burg në total në Britani pas zbulimit të një rrjeti që përdorte agjencinë imobiliare Condor Estates për ngritjen dhe menaxhimin e 19 ambienteve të kultivimit të kanabisit. Vendimi u dha në Gjykatën e Kurorës në Luton, pas hetimit të autoriteteve britanike pjesë e operacionit “Costello”, i cili evidentoi përdorimin e kontratave të falsifikuara të qirave, blerjen e pajisjeve hidroponike, kultivimin e kanabisit dhe pastrimin e parave.
Në vitin 2024 autoritetet kryen kontrolle në 20 prona—19 në Luton dhe një në Milton Keynes. Në 19 prona u gjetën ambiente të përdorura për kultivimin e kanabisit, ndërsa në pronën tjetër u zbuluan pajisje për kultivim. U sekuestruan rreth 2,000 bimë kanabisi me vlerë të përllogaritur deri në 800,000 paund; autoritetet thanë se nëse plantacionet do të vazhdonin të vepronin, prodhimi mund të gjeneronte mbi 2 milionë paund vlerë në treg brenda 12 muajve.
Në qendër të skemës ishte Sarfraz Farooq, 46 vjeç, drejtori i Condor Estates, i cili u dënua me 8 vite e 4 muaj burg për komplot për kultivimin e kanabisit dhe veprime mashtruese. Hetimet i atribuojnë atij përgjegjësi për shumë dokumente të falsifikuara, përfshirë kontratat e qirave false që lejuan përdorimin kriminal të pronave ndërsa pronarët merrnin pagesa qiraje duke besuar në ligjshmëri. Farooq është ndaluar të jetë drejtor kompanie për 10 vite.
Një rol qendror pati edhe shqiptari Uan Gogu, 42 vjeç, i cili organizonte instalimin e pajisjeve hidroponike dhe, sipas hetimeve, manipulonte matësit e energjisë elektrike, duke krijuar rrezik serioz dhe lidhje me shpërthime zjarri në tri prona. Gogu u dënua me 6 vite e gjysmë burg për komplot dhe posedim në kuadër të plantacioneve.
Të tjerë të dënuar përfshijnë Zohaib Riaz Ali, 33 vjeç, i dënuar me 4 muaj burg, i pezulluar për 12 muaj për blerje pajisjesh hidroponike dhe nxitje të veprës; Glentjan Sefaj, 29 vjeç, i dënuar me 8 muaj burg të pezulluar për 18 muaj për rol në komplot; dhe Mohammed Farooq, 76 vjeç, i dënuar me 9 muaj burg të pezulluar për 12 muaj për pastrim parash pas blerjes me para në dorë të një prone që më pas u përdor si plantacion. Autoritetet e kanë cilësuar operacionin si goditje ndaj krimit të organizuar dhe thonë se “Costello” do të vijojë të godasë të gjitha hallkat e rrjeteve kriminale.
