Situata te Real Madridi përpara ndeshjes së së dielës kundër Barcelonës është tensionuar seriozisht. Klubi “Los Blancos” konfirmoi zyrtarisht se mesfushori Fede Valverde do të mungojë në këtë përballje për shkak të një dëmtimi në kokë, i cili dyshohet të jetë pasojë e një përplasjeje fizike me shokun e skuadrës, Aurelien Tchouameni. Sipas raportimeve, incidenti ka ndodhur gjatë ditës së enjte, dhe klubi njoftoi se ka nisur procedurat disiplinore ndaj të dy lojtarëve.
Përditësimi mjekësor i klubit sqaron se Valverde është diagnostikuar me një traumë kranio-encefalike. Ai ndodhet në shtëpi dhe në gjendje të mirë, por mjekët kanë rekomanduar pushim nga 10 deri në 14 ditë, sipas protokolleve mjekësore për këtë lloj dëmtimi. Si pasojë, lojtari do të qëndrojë jashtë fushave për të paktën dy javë dhe nuk do të jetë në dispozicion për ndeshjen e së dielës.
Përveç Valverdes, në gjendje të pasigurt mbetet edhe sulmuesi Kylian Mbappé. Edhe pse ai është rikthyer në stërvitje, nuk është konfirmuar nëse do të jetë plotësisht gati për përballjen me Barcelonën. Kjo pasiguri vjen në një moment kritik të sezonit, pasi katalanasve u mjafton vetëm një pikë në “Camp Nou” për t’u shpallur matematikisht kampionë të La Liga-s.
Klubi ka bërë të ditur nisjen e hetimeve disiplinore ndaj lojtarëve të përfshirë, ndërkohë që ekziston një atmosferë të tensionuar brenda ambientit të ekipit përpara ndeshjes së madhe. Në këtë kuadër, mungesa e Valverdes dhe pasiguria rreth Mbappé shtojnë dilemat rreth formacionit dhe strategjisë që Real Madridi do të përdorë për të tentuar të marrë rezultatin e nevojshëm në “El Clásico”.
Informacioni është dhënë zyrtarisht nga shërbimi mjekësor dhe klubi, ndërsa situata e brendshme sportive dhe disiplinore vazhdon të ndiqet nga afër. Top Channel
