Pagat e larta të punonjësve të kompanisë koncesionare kanë shkaktuar debat në komisionin hetimor të inceneratorëve.
Ishte kryetarja e komisionit, Jorida Tabaku, ajo e cila evidentoi pagat prej 7 mijë euro të punonjësve, të cilat sipas saj janë disa herë më të larta se tregu dhe merren nga fondet publike.
Nga ana tjetër administratorja e kompanisë “Integrated Energy”, Ariola Kodra u shpreh se shoqëria është private dhe ka të drejtën e saj ta vendosë vetë nivelin e pagave, pasi nuk varet nga fondet publike.
Ndërkohë që Tabaku theksoi se kompania ka marrë 35 milionë euro fonde nga buxheti i shtetit për Inceneratorin e Tiranës.
Pjesë nga diskutimet në komision:
Tabaku: Kam këtu pagat e kompanisë që janë paga tre herë më shumë se mesatarja e tregut, janë paga që paguhen nga fondet publike? Pagat e koncesionarit janë tre herë më të larta se pagat mesatare të tregut mund të më jepni një përgjigje për këtë?
Administratorja Kodra: Shoqëria është shoqëri private dhe ka të drejtë të vendosë standardin e pagave në varësi të politikave të saj
Tabaku: Pagat të cilat janë në nivelin e 7 mijë euro janë më të larta se tregu dhe çdo gjë tjetër. 7 mijë euro dhe mos harroni se janë paguar 35 milionë euro nga fondet publike për këtë kontratë. Ky është shqetësimi?!
Administratorja Kodra: Shoqëria nuk operon me fondet publike, por me fondet e saj private.
Tabaku: Shoqëria operon me fonde publike dhe do t’ua tregoj unë si operon në bazë të raportit të Ministrisë së Financave.
