Sokrat Vata, 29 vjeç, nga Hasi, është arrestuar pasi dyshohet se vrau me thikë një turist francez 20-vjeçar në Ksamil. Ngjarja e vrasjes ndodhi në Ksamil, ndërsa i dyshuari u largua nga vendi i ngjarjes dhe u kap disa orë më vonë në Levan të Fierit.
Forcat speciale “Shqiponja” së bashku me strukturat operative lokalizuan dhe arrestuan Sokrat Vatan. Gjatë kapjes, autori ishte fshehur në bagazhin e një automjeti. Mjeti në të cilin gjendej i dyshuari po udhëhiqej nga një shtetase turke 31-vjeçare, ndërsa si pasagjer në të udhëtonte një shtetas turk 38-vjeçar. Të tre personat u shoqëruan dhe u dërguan në Drejtorinë Vendore të Policisë Vlorë për veprime të mëtejshme procedurale.
Grupi hetimor po vepron nën drejtimin e Prokurorisë për dokumentimin e plotë të rrethanave të ngjarjes. Autoritetet kanë ndërmarrë veprimet e nevojshme procedurale ndaj të dyshuarit dhe po vazhdojnë hetimet për të sqaruar gjithë elementët që lidhen me vrasjen dhe mënyrën e largimit dhe fshehjes së të dyshuarit.
