Një fatkeqësi e pagëzuar “cunami nga qielli” ka shkaktuar vdekje të qindra njerëzve në rajonin e Himalajeve, në dy krahë të kufirit mes Nepalit dhe Kinës, ndërsa bilanci i viktimave vazhdon të rritet. Ekspertët po tentojnë të rindërtojnë me përpikmëri dinamikën e ngjarjes, e cila nisi me shkëputjen e një pjesë gjigande nga një akullnajë në anën veriore të malit Tsangbu Ri. Blloku i akullt, që besohet të ketë qenë rreth 600 metra i gjerë, u rrëzua nga rreth 5,200 metra lartësi mbi nivelin e detit dhe gllabëroi çdo gjë në rrugën e tij drejt luginës poshtë.
Sipas shpjegimeve të botuara nga Daily Mail, kur mura i akullit u përplas me shtratin e luginës, u shndërrua në një masë uji të akullt që rridhte me shpejtësi të madhe. Kjo masë përmblodhi mbeturina dhe gurë nga shpatet e malit dhe i përplasi ato në lumin Lende Khola, duke krijuar një valë shkatërruese. Pamjet e tmerrshme të masës së ujit dhe baltës që përplaset mbi pikën kufitare në Rasuëagadhi kanë qarkulluar ndërkombëtarisht; kamerat e sigurisë kapën dhjetëra njerëz duke u përpjekur të iknin me vrap pak sekonda para se gjithçka të zhdukej.
Gjeologu Bishal Nath Upreti deklaroi se vala arriti deri në 200 metra lartësi dhe “i fshiu plotësisht” disa komunitete, duke theksuar se vëllimi i ujit ka qenë i pabesueshëm. Eksperti Daniel Shugar, nga Universiteti i Calgary-t, i tha revistës New Scientist se dyshonte se shkrirja e borës dhe akullit “injektoi një sasi të madhe uji të lëngshëm në akullnajë, i cili depërtoi deri në shtratin e saj.” Sipas tij, kjo shtytje e ujit të lëngshëm në shtratin e akullnajës ka qenë e mjaftueshme që një pjesë e saj të shembej: “Kaq mjaftoi që një pjesë e saj të shembej.”
Raportet përshkruajnë një ngjarje me shpejtësi dhe forcë zhdukëse, ndërsa autoritetet dhe ekspertët vazhdojnë hetimet dhe përpjekjet e kërkim-shpëtimit në zonat e goditura. Top Channel.
