Detaje nga dosja e siguruar nga gazetarja Anila Hoxha tregojnë rreth operacionit për kapjen e Violand Braçellarit dhe vrasjes së punonjësit të policisë Enea Mekolli. Braçellari ishte kallëzuar nga një çoban i punësuar nga familja e tij, dhe ndaj tij ishte hartuar plan operacional; ai ishte i dënuar në mungesë me 10 vjet burg. Sipas dosjes, më 04.06.2026 rreth orës 07:00 forcat e DVP Korçë u afruan në Malin e Bodesë pranë stallave të bagëtive për të ekzekutuar rrethimin. Pa u mbyllur plotësisht rrethimi, janë shkrepur të shtëna drejt punonjësve të policisë; si pasojë u vra me armë zjarri punonjësi Enea Mekolli dhe u plagos punonjësi Edison Adri.
Braçellari tentoi të largohet në drejtim të poshtëm të stallave; pas shkëmbimit të zjarrit u plagos dhe u kap disa metra poshtë stallave. Afër vendit ku kapet u gjet një armë automatike model 56, kalibër 7.62mm, e zbrazët pa fishekë, me qytë të vendosur, bajonetë dhe një fragment najloni që imiton rripin. Në pjesë të armës dhe në krëhër u konstatuan njolla ngjyrë të kuqërremtë si ato të gjakut; krëhëri rezultoi bosh. Në afërsi u sekuestruan dy gëzhoja model 56, 7.62mm.
Në afërsi të dy stallave me mur tulle u gjet një bluzë e bardhë me dëmtime dhe njolla ngjyrë të kuqërremtë. Në vendin e ngjarjes u gjetën dhe sekuestruan shumë gëzhoja model 56, të përqendruara kryesisht në anën e majtë të stallës—vend ku ishin pozicionuar punonjësit e policisë—dhe gëzhoja të tjera rrugës deri te vendi i kapjes së autorit.
Kufoma e Enea Mekollit u gjet rreth 8 metra nga muri i stallës së fundit, me dëmtime në kokë, qafë, vesh, gjoks dhe këmbë, të ngjashme me plagë nga predha armësh. Ai ishte me uniformë dhe jelek antiplumb, ndërkohë që në trup i ishte gjetur arma automatike e operacionit me një krëhër që përmbante 29 fishekë dhe një fishek në folenë e fishekut, çka sipas dosjes tregon se ai nuk kishte qëlluar me armë. Trupi u transportua në morgun e Spitalit Korçë.
Para stallës u gjet një armë model 56 me krëhër që përmbante 23 fishekë dhe një në folenë e fishekut, që mendohet t’i përkiste punonjësit të plagosur Edison Adri. Në vend u sekuestruan edhe katër gëzhoja 9mm GECP LUGGER dhe, gjithashtu, 5 armë me tytë të gjatë dhe 5 jelek antiplumb të ndotur me gjak dhe baltë—sendet e punonjësve të policisë—të cilat u sekuestruan për ekspertim balistik.
