Bundestagu miratoi një reformë të shërbimeve sekrete që u jep atyre kompetenca më të gjera për të ndërhyrë aktivisht kundër kërcënimeve ndaj sigurisë kombëtare. Me ndryshimet e reja ligjore, Shërbimi Federal i Inteligjencës (BND) dhe Zyra Federale për Mbrojtjen e Kushtetutës (BfV) nuk do të kufizohen më vetëm në mbledhjen dhe analizimin e informacioneve, por do të kenë të drejtën të ndërmarrin veprime konkrete ndaj kundërshtarëve dhe kërcënimeve të identifikuara.
Sipas reformës, BND-ja, përgjegjëse për inteligjencën jashtë vendit, mund të ndërhyjë në mënyrë aktive ndaj sulmeve kibernetike të organizuara nga shtete të huaja, duke sulmuar dhe nxjerrë jashtë funksionit sistemet digjitale të kundërshtarëve. Në raste të caktuara, ajo mund të ndërhyjë edhe për të shkatërruar armë të kundërshtarëve, nëse ato paraqesin një rrezik për Gjermaninë. Ndërsa BfV-ja, e cila merret me sigurinë e brendshme, do të fitojë kompetenca të reja për situata të veçanta rreziku: hyrje në banesa të personave të dyshuar pa urdhër paraprak kontrolli nga gjykata dhe ndërhyrje në kompjuterët dhe telefonat inteligjentë të tyre.
Ministri i Brendshëm, Alexander Dobrindt, e përshkroi reformën si një ndryshim historik dhe argumentoi se kërcënimet ndaj Gjermanisë janë shtuar, me përmendje të Rusisë, sulmeve kibernetike, ekstremizmit politik dhe fetar, si dhe aktiviteteve që synojnë destabilizimin e institucioneve demokratike. Sipas tij, Gjermania ka nevojë për shërbime sekrete më të fuqishme për t’u përgjigjur këtyre rreziqeve.
Reforma ka nxitur debate të forta politike dhe juridike. Partitë AfD dhe E Majta votuan kundër, ndërsa Të Gjelbrit abstenuan. Kundërshtarët thonë se qeveria u jep shërbimeve kompetenca të tepruara dhe rrezikon shlyerjen e ndarjes tradicionale mes inteligjencës dhe policisë, një parim themelor i sistemit gjerman të sigurisë i vendosur pas përvojave të diktaturës naziste dhe abuzimeve të Gestapos. Ekspertë të së drejtës kushtetuese, përfshirë profesorin Matthias Bäcker nga Universiteti i Mainzit, kanë shprehur shqetësime se kompetencat ndërhyrëse mund të cenojnë të drejtat themelore të qytetarëve, veçanërisht hyrjet me forcë në banesa dhe ndërhyrjet në pronën private pa garanci gjyqësore të zakonshme.