Anija më e madhe e pasagjerëve e tërësisht elektrike në botë, “China Zorrilla”, ka mbërritur në Uruguai nga Australia dhe do të operohet nga kompania Buquebus në linjën midis Colonia-s dhe Buenos Airesit. Trageti ka kapacitet për deri në 2,500 pasagjerë dhe 225 automjete, ndërsa investimi për ndërtimin e tij arrin rreth 200 milionë dollarë, me financim të pjesshëm nga Banka Botërore. Pritet që ai të nisë operimin në këto dy brigje, në një linjë rreth 60 kilometra të gjatë, në mesin e tetorit.
Për të mundësuar funksionimin e anijes elektrike, portet e Buenos Airesit dhe të Colonia-s janë pajisur me stacione të posaçme karikimi. Energjia ruhet në katër bateri gjigante me kapacitet të lartë, të cilat furnizojnë tetë motorët elektrikë të tragetit, duke eliminuar nevojën për motorë konvencionalë me djegie të brendshme gjatë plote të shërbimit. Sipas kompanisë, projekti për krijimin e linjës së parë të transportit të operuar nga një anije plotësisht elektrike në Amerikën Latine nisi menjëherë pas pandemisë së COVID-19.
“China Zorrilla” është ndërtuar në kantierin Incat Tasmania në Hobart, Australi, nga alumin detar me rezistencë të lartë. Pas përfundimit të ndërtimit, trageti u ngarkua në një anije të specializuar për transportin e ngarkesave të rënda dhe përshkoi më shumë se 15,000 kilometra për të mbërritur në portin e Colonia-s në Uruguai.
Hyrja në shërbim e tragetit synon të reduktojë ndjeshëm përdorimin e karburanteve fosile në një prej korridoreve më të rëndësishme të transportit të pasagjerëve mes Uruguait dhe Argjentinës, duke sjellë një alternativë elektrike për lidhjen e shpejtë detare mes dy brigjeve.
