Kryeministri Edi Rama u shpreh se drejtësia ka ndjekur dhe çuar përpara njerëz të pushtetshëm dhe se misioni i tij është që Shqipëria të ecë përpara dhe të qëndrojë me kokën lart. Duke komentuar protestat dhe thirrjet për t’i hapur rrugë rinisë, ai paralajmëroi se pas kësaj mund të rikthehet e kaluara dhe theksoi se në lojë nuk është pushteti i tij personal, por tryeza e negociatave me Bashkimin Evropian.
Rama vuri në dukje “kaosin e dezinformimit” dhe tha se fëmijët që u futën për të marrë iPhone janë viktima të atyre që promovojnë pasuri dhe pozat në Instagram, duke i bërë të ndihen të pavlerë. Ai mohoi se bëhet fjalë për pushtetin e tij personal, duke thënë se dikur kishte dëshirë të takohej me të mëdhenjtë e botës, por se tashmë nuk ka dëshirë të udhëtoj për këtë pushtet.
Duke iu kundërpërgjigjur kritikëve, Rama i përshkroi ata si “tufë të paaftësh, mediokër, ziliqarë” që nxisin dhunë sepse nuk mund ta mundin me zgjedhje. Ai kujtoi se protestat nisën me hedhjen e shisheve të ujit dhe vezëve dhe arritën deri tek hedhja e gurit.
Kryeministri tha se negociatat me BE-në kanë një kalendar që shtrihet deri në fund të vitit 2027 dhe se “dritarja është e hapur tani”. Sipas tij, kalendari kërkon përfshirje të përditshme për të çuar përpara, për të korrigjuar dhe për të bërë marrëveshje me Komisionin Evropian. Ai paralajmëroi se ky proces mund të ndërpritet nëse largohet dhe në vend të tij vijnë forca të tjera politike, duke nënvizuar se nëse shteti dorëzohet para kësaj do të duhet shumë kohë për t’u rimëkëmbur.
Rama përfundoi duke theksuar se nuk është çështje e pushtetit të tij personal, por e qëndrueshmërisë së shtetit dhe e vazhdimësisë së negociatave me Bashkimin Evropian.
